Títulu: Perdida
Autora: Gillian Flynn
Torna: Óscar Palmer Yáñez
Editorial: Mondadori
Añu: 2012
UNA PAREYA AUTODESTRUCTIVA.- Tenía les mios dubies enantes de principiar a lleer esta novela, porque nos últimos tiempos y de mou mui rápidu, convirtióse nun verdaderu best-seller con ventes millonaries y l’acompañamientu d’una película que tampoco nun fui a ver. Pero’l comentariu favoratible de dalgún amigu emburrióme a empezala cola condición sine qua non de llegar, siguiendo’l compromisu conmigo mesmu, polo menos hasta la páxina 100. Tengo de dicir que la terminé.
Y terminéla porque se trata de una novela interesante y orixinal. Una novela escrita con un estilu que me presta, que mecia reflexones intelixentes, llinguaxe fluídu y un ciertu sentíu del humor qu’acompanga tol rellatu, inclusive nos momentos más dramáticos, que dalgún hai. Nun quiero destapecer l’argumentu porque hai abondes sorpreses que l’autora va ufiertándonos con cuentagotes. N’honor d’ella hai que dicir que les sorpreses nun son patagüeyaes que dellos autores tramposos se saquen de la manga, sinón que toes elles tienen una coherencia y van empobinaes al fin al que la señora Gillian Flynn quier llegar.
La novela vien arreyada, según la crítica, a lo que se conoz como «xéneru negru», pero en realidá, y salvo en mui poques ocasiones, a lo qu’asistimos ye a la descomposición y posterior intentu de recomposición d’una pareya qu’empieza con una especie d’ amour fou y termina cuasi como’l rosariu de l’aurora. La historia nun tien un narrador propiamente dichu, sinón que son los dos protagonistes, de mou individual, los que nos dan la so versión de lo que ta pasando. Unes veces en forma de diariu -recursu emplegáu por Amy, la muyer- o cuntándolo en tiempu real como fai Nick, el maríu. Les versiones, cuasi siempre, nun son sólo distintes, sinón antagóniques, porque caún quier desplicar lo qu’asocede a la pareya presentándolo de mou favoratible pa sí mesmu. Los otros personaxes qu’asomen na novela cumplen como perfeutos secundarios pa enmarcar los socesos, destacando al mio xuiciu la composición de los padres d’Amy, escritores famosos, que despliquen en parte los comportamientos posteriores de la so fía.
En resume, trátase d’una entretenida novela que se llee con interés y con la incertidume de qué final va a tener, de los munchos que podríen aldovinase. Tengo de dicir que l’escoyíu pola autora, anque nun hai «pero» que pone-y, fue’l que menos me prestó de toos ellos. Pero bueno, eso yá ye cosa mía.
