Títulu: Ciudades de la llanura
Autor: Cormac McCarthy
Torna: Luis Murillo Fort
Editorial: Literatura Random House
Añu: 2009
LOS MALOS AMORES DE JOHN GRADY.- Ye esta novela, Ciudades de la llanura, la última de les tres que conformen la llamada triloxía de la frontera del autor norteamericanu Cormac McCarthy. Ye la última y, quiciás, la que produz un mayor desasosiegu. D’esi mou, lo que nes dos noveles anteriores yera cantu a la naturaleza y amor a los animales, aún calteniéndose, dan pasu a una historia muncho más zarrada, cuasi monotemática, al rodiu d’un nuevu amor imposible d’un de los protagonistes: John Grady. Porque, n’efeutu, el veteranu autor de La carretera xunta nesta historia decadente d’un mundu qu’esapaez, tarazáu pela modernidá, a los dos mocinos de les dos noveles anteriores: John Grady y Billy Parham. Un par de rapazos que salen de l’adolescencia pa entrar nel mundu adultu, pente medies d’unes desgarradores histories personales. El primeru, namoráu de la fía del patrón, una rapacina entá más moza qu’elli, cola llóxica oposición de so padre que fai tolo que pue -y pue abondo- pa esbayar esa rellación. Una rellación que-y produz cárcel y desconsuelu, amás de dalguna qu’otra cicatriz. Y el segundu, Billy, que tamién pierde a un hermanu y a la moza que-y prestaba, per esos caminos mexicanos desdexaos de la man de Dios.
Los dos xuntos van protagonizar, como dicimos, esta tercera entrega la más afogante de les tres. Porque’l bonu de John Grady vuelve a namorase de quien nun debe: una xoven prostituta y epiléptica, que trabaya nun burdel de Juárez México. Anque l’amor a primera vista ye recíprocu, les circunstancies vitales van torgar que la cosa furrule llegando a unes escenes finales de gran dramatismu. La descripción de la pelea a cuchiellu que se cuenta y na que John Grady participa, ye calofriante pol verismu y lo bien narrao que se nos ufierta.
La novela, nostante, ta enllena d’otros valores positivos, sobre too l’amistá. Billy y John son dos fieles amigos que comparten vida y oficiu, pero tamién consuelu y axuda cuando les coses pinten mal. Hai tamién una fonda ética individual de la persona que sabe que lo tien too a la escontra, pero que debe siguir lluchando poles sos idées y lo que daveres busca nel mundu. Y pa ello pon en xuegu tolo que tien, o meyor, lo único que tien: la so propia seguridá, la so propia vida. Y a la fin, dicir que se trata tamién d’una perguapa historia d’amor ente dos marxinaos de la vida, dos seres necesitaos de cariñu que s’alcuentren nunes circunstancies dafechamente dramátiques. Too eso, y seguro que munches coses más, ye ésta Ciudades de la llanura del gran Cormac McCarthy. Un escritor al qu’almiramos pese a que siempres nos dexa col corazón metíu nun puñu. O a lo meyor ye por eso mesmo.
