Títulu: Los símbolos
Autor: Francisco González Ledesma
Editorial: Plaza y Janés
Añu: 1987
LA BARCELONA DE POSGUERRA.- Yera llóxico que, tanto Madrid como Barcelona, fueren les dos ciudaes más y meyor retrataes na lliteratura de posguerra. Nelles, ente les barriaes de cases míseres, nes cais puerques y entá colos escatafinos de los combates, una masa de seres anónimos sufren (muncho), gocien (poco) y desendolquen la so vida qu’a nada nin a naide interesa. Pero dientro de esa xente ensin nome, asoceden tamién histories que merecen ser cuntaes. Non siempre son histories de valor o de grandes principios, al revés, suelen ser histories de cobardíes, de delaciones, de crueldaes aprovechándose de los que ganaron la guerra pa medrar o, cenciellamente, ganar unes monedes pa siguir tirando nesa noria que ye la sosistencia. El poder vivir cada día.
Barcelona tien el so importante cronista, Juan Marsé, cuya mayor (y meyor) parte de la so producción lliteraria ta empobinada a les sos histories urbanes. Quiciás Si te dicen que caí y Un día volveré seyan, al mio modestu xuiciu, les meyores. Y por ello, pese a que me prestó, nun me pilla de nuevo tol ambiente que s’espeya en Los símbolos, novela qu’escoyí pa recordar al autor, fallecíu a primeros d’esti añu: tal paez que tamos lleendo a Marsé.
Nun quiero qu’esto vaya a entendese como un menospreciu a González Ledesma, un escritor «d’oficiu», nel meyor sentíu de la espresión, y que se mueve peles cais, les casuches y los barrios de «mala nota» de la Barcelona de posguerra como pexe nel agua. Non. Lo que pasa ye que ya tenemos muncho andao perellí de la mano del autor de «pijoaparte», pa qu’agora nos sorprenda lo que Ledesma nos cunta. Y eso que siempres y tuvi muncha gratitú por ser un d’esos que despeutivamente llamaben «escritores de quioscu», que fueron los padrinos lliterarios de la mio infancia y mocedá. Silver Kane (Ledesma) yera un d’ellos. Pero nun me suena «a nuevo» lo del pistolerismu, les estafes, y los personaxes de «mediu pelo» qu’abeyen peles Rambles o el Paralelu. Con too, paga la pena lleer esta novela onde’l tresfondu políticu del franquismu ta siempres presente, nuna Barcelona de fulleros que faen negociu a costa de la miseria de los demás. Y de pasu, fadremos revivir per unos díes, a esi «corredor de fondu» que fue Francisco González Ledesma, qu’en paz estea.
