TÍTULU: Calle de las Tiendas Oscuras
AUTOR: Patrick Modiano
TORNA: María Teresa Gallego Urrutia
EDITORIAL: Anagrama
AÑU: 2009 (d’un orixinal de 1978)
ESCURA MEMORIA.- Patrick Modiano ye un de los más afamaos escritores franceses al puntu que tien, como los equipos de fútbol, verdaderos «fans»: los modianistes. Autor de cultu, cuasi tola so obra ta traducida al castellán y la mayoría na editorial Anagrama. Pese a too, yo nunca nun lleere nada d’él, y fue Ángeles Carbajal, tomando un café, la que me lu recomendó encesamente. A ella présta-y muncho.
Con esti precedente, lleí estos díes Calle de las Tiendas Oscuras y tengo de dicir que me gustó… pero quiciás non tanto como a la mio amiga. Esta Calle… de nome tan evocador (correspuende a una cai de Roma) enzarra la historia d’un home en cata de la so identidá, pero non en sentíu metafóricu, sinón real. El protagonista carez una amnesia que-y impide saber, satamente, quién ye y cuálos son los sos oríxenes. Depués de trabayar unos años nuna axencia de detectives, a onde acudió nun principiu buscando información, y tres la xubilación del dueñu, decide entamar él mesmu la búsqueda. La novela ye, pues, el relatu d’esa búsqueda a través de pistes mínimes: un comentariu, una direición, una vieya foto… Asina Guy Roland -nome ficticiu- anda peles cais de París buscando escatafinos y faciendo por iguar un puzzle que tien dificil igua. En cualquier casu, da la impresión de qu’esi interés del protagonista por conocer el so pasáu ye meramente intelectual y non, como pudiere asoceder n’otros casos, más vital. La preba d’ello ye que tuvo cuasi diez años trabayando en diverses investigaciones ensin ocupase de la suya.
La novela fízoseme estraña, fría, esenta d’emoción y anque la prosa de Modiano ye mui guapa, un nunca nun llega a conocer -muncho menos a identificase-a unos personaxes alternativos que pasen peles sos páxines como una rabasera. El méritu ye que, pese eso, la historia avanza y el puzzle que se fae y se desfae principia a tomar cuerpu. Nesi acontecer, l’autor llogra tresmitinos la idea de que la identidá, la nuestra, la de toos, nun ye sinón dalgo inaprensible, camudable, esvanescente. Una clas de superestructura, d’añadíu, que nos ponemos enriba pa poder andar pela vida pero que, a la fin, ye como un vaho que enseguida se disipa. Habrá que lleer más a Modiano porque lo que ta claro ye que se trata d’un escritor distintu, con un mensaxe propiu y una forma d’atalantar la vida, o de nun atalantala, que causa una cierta esmolición: nun te dexa indiferente.
