Títulu: La suerte de Jim
Autor: Kingsley Amis
Torna: José Manuel Benitez Ariza
Editorial: Destino
Añu: 2007 (de un orixinal de 1953)
El maestru d’una xeneración.- Kingsley Amis (Londres, 1922-1995) fue un importante lliteratu inglés, novelista, poeta, críticu y autor d’un balagar d’interesantes llibros. Pero sobre too fue, al mio modestu talantar, el maestru d’una xeneración de’escritores que vinieron detrás d’elli tratando’l mesmu (o paecíu) tipu de novela. Una novela divertida, intelixente, culta, d’eses que te faen esfrutar cola sonrisa nos llabios, al tiempu que te diseccionen perfeutamente a la sociedá británica y sobre too, a la so intelectualidá encarnada en escuros profesores universitarios coles sos intrigues y vides mas bien fracasaes: Ian MacEwan, David Lodge, el propiu Martin Amis, fíu suyu, y una llarga nómina d’autores son deudores d’esi mou de narrar, desenfadáu, críticu, coñón, nos que los protagonistes avecen a ser antihéroes a remolque de les circunstancies.
La suerte de Jim ye, pues, una divertida novela na que Jim Dixon, un modestu profesor d’Historia Medieval llucha por conseguir un puestu fixu nuna Universidá inglesa, pa lo que tien que pasar per munchos aros que-y pon el catedráticu, y baillar al son que toquen persones ayenes a la Universdá, pero con influencia nella. Al tiempu tamién llucha por llograr l’amor d’una moza a la que pretende, pero que nun paez tar mui pol llabor de finar nos sos brazos. Tola historia ta enllena de chispa y mordacidá, y hai algunes escenes antolóxiques como la del autobús nel que viaxa a última hora pa llogran algamar a Christine, que se-y escapa nun tren camín de Llondres. Curiosamente, esta novela que fue la primera y la meyor de Kingsley Amis, nun fue tornada al castellán hasta mui tarde, cuando yá’l restu la so obra lo taba. En fin, como se diz nestos casos, val más tarde que nunca. Y paga la pena poder lleela anque seya a estes altures de la so muerte. Mui recomendable.
