Títulu: Lo que no te mata te hace más fuerte
Autor: David Lagercrantz
Torna: Martin Lexel y Juan José Ortega Roman
Editorial: Destino
Añu: 2015
DE HEROÍNA A SUPERHEROÍNA.- Teniá curiosidá por lleer la cuarta entrega de «Millennium», esa interesante saga que salió del maxín de Stieg Larsson que, como persabemos por activa y por pasiva, morrió enantes de vela publicada y, por tanto, nun supo del ésitu lliterariu y (menos) cinematográficu de la so obra. Creo que fici equí, nesti blogue, la crítica de los tres llibros anteriores colo que, el curiosu que quiera lleela nun tien más que meter el títulu nel buscador qu’hai enriba. La cosa paecía que finaba ehí, muertu l’autor del inventu, pero había unos personaxes mui atrautivos y, sobre too, munches perres esnalando al rodiu d’ellos pa que los heriedes dexaran morrer la cosa. D’esi mou, tuvieron en cata d’un autor/a pa face-y el difícil encargu de siguir dando vida a Mikael Blomkvist y a Lisbeth Salander, cuya química, y tamién física, funcionen perbién. Y la verdá ye que lu alcontraron, pues esti David Lagercrantz del anunciu, resuelve’l problema de mou mui positivu hasta’l puntu de nun echar en falta al probe Larsson, que Dios o Thor tenga na so gloria.
El filu argumental anda esnalando sobre’l tema de la intelixencia artificial y los robos informáticos, onde una banda de ciberlladrones, con unos cuantos rusos malos, roben datos industriales pa vendelos por munches perres a otres empreses qu’asina, adelántense a los sos competidores. Anque un piérdese un poco cuando la cosa quier ponese téunica, abasta c0n saltar un par de párrafos pa que la cosa siga onde la dexaste. El mayor méritu d’esti continuador de la serie (un perfeutu desconocíu pa min) ye la so fidelidá total al marcu y a los personaxes de les noveles anteriores. Nun hai pruebes, nin saltos nel vaciu. La revista Millennium y el so entornu son los mesmos. Los detectives repiten, inclusive con un migayín más d’humanidá. Y los dos protagonistes desendolquen los sos papeles xusto onde los dexaron na novela anterior. La maquinaria funciona. Hai, al mio modestu talantar, un gran acierto col personaxe del neñu autista, que da munchu xuegu hasta convertise na exa sobre la que xira la historia. Elli y sos padres. Tanto l’auténticu como’l padrastru. Y un nuevu personaxe femenín mui potente, del que nada voi dicir pa nun escamar al personal. L’unicu pero que-y pongo a esti David d’apellíu tan raru ye… que se pasa un poco. Y pásase sobre too col personaxe de Lisbeth Salander que tien munchu ganchu, pero que nos la camuda nuna superheroína de comic. Nun tien superpoderes, pero cuasi. Cuerre, salta, pega, dispara, queda ferida de bala y cúrase ella sola. Y siempre intimida, sólo cola so presencia. Home, nun hai que desaxerar tanto, como taba yá yera bastantina. Y por poner otru pequeñu pilancu, quiciás la trama ye un poco más plana que nes noveles anteriores que mezclaben más coses. Equí ye un poco demasiao llinial. Polo demás, y ye muncho, trátase d’una novela mui entretenida, bien resuelta y que nos da munchu contentu a los siguidores de la serie porque sabemos que tendremos a más Salander prósimamente. Agora sólo-y faltará volar.
