Títulu: Todo lo que hay
Autor: James Salter
Torna: Eduardo Jordá
Editorial: Salamandra
Añu: 2013
¿NOVELA O CUENTOS?.- Varies veces salió a rellucir nesti blogue la importante figura del escritor norteamericanu James Salter. La primera cola reseña del so guapísimu cuentiariu La última noche, y la cabera creo que fue, precisamente, de magar se conoció’l so fallecimientu. Autor imprescindible, abúltame que dixi nel so momentu que prefería los sos cuentos a les noveles y si ye que nun lo dixi, dígolo agora. Pásame un poco como con otros escritores que, al mio modestu talantar, muévense meyor nos rellatos curtios que nos argumentos de mayor estensión, y como exemplu avezo a citar a Julio Cortazar, pese a lo so almirada Rayuela.
Con Todo lo que hay -préstame la cenciellez y, al tiempu, la rotundidá del títulu- pásame lo mesmo. Non que me guste menos que los sos cuentos sinón que, en realidá, la novela nun esiste como tal, conformándose como una socesión de pequeñes aneudotes con un mesmu protagonista, y non siempre, que mui bien podríen estructurase como una serie de cuentos. Philip Bowman regresa de la Segunda Guerra Mundial y, a la escontra d’otros munchos soldaos que, depués de lluchar en defensa del so país nun atopen facilmente trabayu, él entra nuna empresa editorial y ellí va, práuticamente, a permanecer el restu la so vida. La novela va siguiendo la trayeutoria vital y profesional de Bowman a traviés, sobre too, de la so rellación coles muyeres. Cada encuentru con una nueva muyer, dende la primera que termina nun boda frustrada al poco, vien a ser como una pequeña historia independiente con tolos ingredientes que pueblen los sos cuentos: erotismu, diálogos intelixentes, reflexones sobre aspeutos culturales, fundamentalmente llibros, claro, pero tamién otros elementos artísticos. Asina que, anque hai personaxes que lu arrodien a lo llargo de tola historia, la novela carez de un verdaderu nudu y un desenlace al mou tradicional, filvanándose como una serie d’alcuentros amorosos cuntaos cola elegancia y la intelixencia a que Salter nos tien avezaos.
Ye una llástima’l so fallecimientu esti añu pasáu, pues la llectura de cualquier cosa del escritor neoyorquinu ye siempres una fonte de placer. Cuasi tantu como’l que busquen los sos personaxes nos socesivos alcuentros que conformen estes histories, anque dacuando vengan editaes como si fueren una novela, como ye’l casu. A destacar un guapísimu final, en forma de reflexón al rodiu de la muerte, onde l’autor amiéstase col protagonista tratando de busca-y un sentíu a dalgo que da la impresión que nun tien.
