Pásame munches veces que tengo qu’esperar a que dalgún escritor famosu muerra, pa enterame de coses rellacionaes cola so vida o la so obra. Nun soi como esos qu’escriben nos periódicos que paecen sabelo too d’él, y tener lleídes les sos obres completes. Y como tampoco se trata d’entrar na sabiduría másima de Wikipedia pa tirase unos pegotes, lo meyor ye callar o procurar aportar dalguna impresión personal.
Pasa tamién que a mí siempre me interesó más la obra d’un autor que la so vida y, como ya dixi otres vegaes, hai escritores que me caen fatal, pero préstame lo qu’escriben, y «al resve», hailos que me paecen grandes persones, pero nun me da más polos sos llibros. ¿Exemplos? Abúltame que yá los punxe dalguna vez: Vargas Llosa caeme fatal, pero interésame la so narrativa. Y Delibes yera un ser humanu maraviosu, pero nun me da más polos sos llibros (la culpa ye mía, claro)
Morrió Gore Vidal. Lleo que yera homosexual, mui críticu col so país y que lo meyor de la so obra yeren los ensayos.
Siento nun poder opinar, nun lleí nengún. Tamién qu’intentó ser políticu (paez que nun yera tan llistu) y que fracasó. Gracies a Dios, habría que dicir, pues perderíemos al lliteratu famosu. Pero sí puedo dar una pequeña pincelada personal, porque lleí una de les sos noveles: «Juliano, el apóstata». Tengo la edición de Edhasa de 1983, con una sobrecubierta dafechamente masuñada, porque recuerdo tenela prestada a tola familia, incluyíes sobrines y amigues de sobrines. Eso quier dicir que me prestó, y que la recomendé. Y ye que, como’l mismu Vidal dixo, el personaxe de Juliano, col so intentu de detener al cristianismu y facer revivir el helenismu, fizo que pasare a la Historia con un ciertu álitu de romanticismu. La novela, que principia de forma epistolar, aína pierde esi encorsetamientu pa camudase en dalgo vivo, que fluye y que se llee con interés. Nun recuerdo agora los detalles que más me prestaron, tendría que la relleer (cosa qu’igual faigo), pero sirva esta pequeña noticia de que se trata d’una mui intersante novela y mui bien escrita. Igual nun llega al «Yo, Claudio» de Graves, o a les siempre relleíbles «Memories d’Adrianu» de la Yourcenar, pero paga la pena que, el que nun la lleere, aproveche agora pa facelo. Y poco más soi a dicir d’esti escritor famosu recién fallecíu, o sea que’l que quiera más detalles, que compre’l periódicu. Ellí sábenlo too.
