Llegué a ella por aciu del comentariu d’una amiga en Facebook (¡gracies, Charo!) y pol so paecíu col clásicu Shakespearianu de «Hamlet». El comentariu yera mui allabanciosu y más sero enteréme de que Hamnet y Hamlet son na realidá’l mesmu nome que pue escribise de les dos formes, tolo cuál llevóme a principiar cola llectura de la novela de la norirlandesa Maggie O’Farrell a la que nun tenía’l gustu de conocer. Y asina, un poco de rebote, como los goles nel últimu minutu, llegué hasta esta guapísima novela de la que toi falando.
Una novela n’efeutu guapísima y, como digo nel titulu, tamién murnia. Porque la historia trescurre na so totalidá al rodiu de la muerte del fíu de William Shakespeare -l’únicu varón- Hamnet. Hai un enantes, un durante y un depués de la muerte del rapaz -once años tenía al so fallecimientu- y nun desvelo nada al cuntar esto pues anúnciase yá dende l’entamu de la novela cuál va ser el ñudu del argumentu. Ensin embargu, el que vaya a la llectura esperando alcontrar nes sos páxines el protagonismu del reputáu autor inglés pue llevar una sorpresa porque, polo menos al mio xuiciu, hai una sola y única protagonista que ye la so muyer Agnes. Y ye qu’Agnes ye un de los personaxes femeninos más potentes que recuerdo no que llevo lleído nos caberos años. Una muyer especial, con un aquel primitivu, pero enllena d’intuiciones, de conocimientos de la ñatura, de sensibilidá y d’amor que nun siempre acierta a esplayar. Ella sola impulsa a la novela hacia alantre dando espaciu a tolos personaxes que l’arrodien. Dende la so misteriosa madre, la madrastra y los hermanastros, el so verdaderu hermanu, los sos fíos… y el maríu. Tan consciente ye l’autora de la importancia del personaxe que, pa que nun-y robe nengún protagonismu, el famosu Shakespeare pasa pela novela ensin que llegue nunca a pronunciase’l so nome. Asina ye «el so maríu», «el padre del rapaz», «l’escritor»… ensin dicir enxamás de quién se trata por más que’l llector yá lo sepa.
O’Farrell ye tamién una gran descriptora del mundu medieval, de les profesiones, de la vida cotidiana, de los rituales de vida y muerte, del pasu de les estaciones… Too ello cuntao con una prosa cenciella y enllena de sentimientu. Les páxines nes que realmente asocede la muerte del so fíu tán cuntaes con una tristura tan contaxosa, que te fai seguiles coles llárimes nos güeyos, al tiempu que son un esfrute (cola tristura tamién s’esfruta) que nun quies aforrate de lleer. Y a la fin, too aquello qu’Agnes nun ye a desplicase, toles duldes que tien acerca del so maríu, queda esclariao nun final mui guapu que ye a zarrar una novela redonda y magnífica. Recomiéndola encesamente anque toi seguru de que tamién a vosotros vos encoyerá l’ánimu. Que nun vos importe.
