Alek Popov ye, de xuro, l’escritor búlgaru vivu más destacáu. Novelista, dramaturgu y ensayista, ye miembru de l’Academia de la Ciencia Búlgara, del PEN Club y del conseyu de redaición de la revista Granta, en Bulgaria. Llega agora a les llibreríes españoles, de la mano de la editorial «Hoja de Lata», la so tercer novela col títulu qu’encabeza esti post: «Kara y Yara en la tormenta de la historia». Nella destaca, percima de too, el sentíu del humor d’un autor que xuega, en plan coñón, colos tópicos y el pallabreru de les organizaciones derivaes o afines a la Unión Soviética, nos años en que Stalin dirixía’l país con mano de fierro.
Tamos dafechu en plena Segunda Guerra Mundial na que Bulgaría entró formando parte de les potencies del Exe. Quier dicise, sobre too, aliada de los nazis. Pero una parte la población nun taba d’alcuerdu con esi alineamientu y llánzanse a lluchar escontra’l so propiu gobiernu. Son los «partisanos» búlgaros que s’echen al monte tratando de boicotear les aiciones militares del exércitu búlgaru. Ésti, al tiempu, manda a lluchar escontra ellos a una especie de «antipartisanos», o guerrilles oficiales que pretenden acabar cola so resistencia.
Kara y Yara son dos hermanes ximielgues, de procedencia burguesa, pero con una ñidia conciencia de clase (la contraria a la suya) que, depués de dalgunes disparataes actuaciones nel so institutu, deciden sumase a los partisanos pa lluchar xunto a ellos. La llegada de dos moces xóvenes, intelixentes y bien preparaes causa nel grupu guerrilleru un trauma de variaes consecuencies. La novela cuenta, con muncha retranca, la convivencia a lo llargo un tiempu d’esa mecia de personaxes na qu’abeyen xentes pintoresques. El comandante Medved tien que llendar a esi variopintu grupu humanu de perpoca disciplina y munches ganes d’agradar a les dos mocines aventureres. Hai momentos dafechamente divertíos, pero xunto a ellos nótase la mano áxil del escritor con un gran poder de descripción, y un conocimientu militar que esplaya nes escaramuces que van produciéndose a lo llargo l’argumentu. Ye una novela mui bien encadarmada, que siempres interesa y que da una güeyada, aguda y desenfadada, d’unos años y una situación non del too conocíos pol gran públicu, ente los que yo m’alcuentro. Mui recomendable la so llectura que vos fará pasar unos bonos momentos na compañía d’unos seres curiosos ya irrepetibles. Prestóme muncho, la verdá.
