«Compañía Asturiana. 100 años de Teatro Asturiano» ye’l títulu de la esposición que ta cellebrándose estos díes nel patiu del Antiguu Institutu Xovellanos, y que pretende recoyer les actividaes de les distintes compañíes qu’acuñaron esi nome dende principios del sieglu XX. Nun quier dicir eso que nun hubiere escrito teatru en llingua asturiana enantes d’esa dómina. Sabemos que, por exemplu, don Xosé Napoleón Acebal y Morán tenía escrites dos obres mui anteriores, Los trataos, de 1835, y El camberu ensin les truches, fechada en 1879 pero, seguramente, anterior. Nun sólo eso, sinón que neses dos obres yá va a quedar afitáu’l patrón tipu del teatru costumista asturianu, llueu siguíu hasta la fartura. Pero, bueno, lo que recueye la esposición ye la historia y abondos materiales de les distintes compañíes asturianes que llevaron esi nome, principiando pola Compañía Asturiana d’Isidro Carballido, de 1920, y pasando por autores y actores que continuaron esi trabayu como fueron Pachín de Melás, Eladio Verde, José Manuel Rodríguez, Adeflor, Aurora Sánchez o Manuel Llaneza, formando grupos estables de teatru costumista: La Compañía Lírica Asturiana de Comedias, la Compañía Asturiana de José Manuel Rodríguez, la Compañía Asturias de Felipe Villa, la Compañía Asturiana de Aurora Sánchez y Pepe Gutiérrez o la Compañía Lírica Asturiana de Antonio Medio, por citar sólo unes poques.
L’actual Compañía Asturiana de Comedias, dirixida por Eladio Sánchez, cumple agora 30 años de vida -de bayurosa vida, diría yo- entamando esta interesante esposición onde se cuenten estos caberos cien años utilizando paneles, semeyes, recortes de periódicu y traxes de representación, con bones desplicaciones pa facenos una idega de cómo funcionaben, y funcionen, estos grupos que caltuvieron viva la llingua asturiana nunos años nos que tuvo a piques d’esapaecer. Al empar d’ello, y como actividaes paraleles, cuasi tolos díes hai una representación o un visionáu d’una obra clásica del xéneru. Too ello forma un conxuntu mui prestosu ya interesante que paga la pena visitar. Hasta’l día 31 de mayu podéis davos una revolada perellí.
