Toos tenemos la esperiencia de tener visto nos llibros que lleemos, y los escritores nos qu’escribimos, les iniciales ISBN precediendo a un númberu de varios díxitos. Eses sigles correspuenden a la espresión inglesa International Standard Book Number, o seya, Númberu Estandar Internacional de Llibros, que supón una forma d’identificar un llibru empobináu a la so comercialización. L’axencia encargada de talos menesteres yera, hasta va pocu tiempu, de titularidá pública y los sos servicios gratuitos. Pero de magar el 17 de xunu de 2011, esti serviciu privatizóse quedando la so xestión en manes de la Federación de Gremios d’Editores d’España (FGEE). Esta cesión del serviciu fízose «a deu», ye dicir, ensin sacalo a concursu públicu dalgún, como se faen munches coses nesti puñefleru país.
Y, curiosamente, lo primero que fizo la FGEE fue quitar la gratuidá ya imponer unes tarifes bien cares cola carauterística amestada de que lo resulten muncho más, proporcionalmente, a les editoriales pequeñes que a les grandes. O seya, les que pertenecen a la Federación. Y ye qu’esta Federación forma un especie de Club de ricos, restrinxíu a les grandes editoriales del País, puesto que l’accesu a la mésma ye mui caro pa una editorial modesta o «de provincies». Y como too va enriestrao, la non pertenencia a esi Club priváu de ricos, escluye tamién de DILVE, una plataforma pa tolos profesionales de la cadena del llibru, que ye la que distribuye les informaciones bibliográfiques y comerciales del llibru. O seya, les que lleguen a llibreríes, distribuidores, biblioteques, etc. De tal mou que si una editorial nun ta en DILVE, ye cuasi como si nun esistiere. D’esa manera, les editoriales asturianes, y otres munches de pequeñes comunidaes o de pocos recursos, anque fueren d’un nivel altísimu, tienen una dificultá añadía de tal altor que-yos torga el so funcionamientu y la so supervivencia. Otra vuelta, el pexe grande cómese al pequeñu, ante la impasibilidá d’una alministración que se crucia de brazos viendo cómo tán a puntu desapaecer un piñu d’importantes editoriales, arrequexaes d’esi mundu poles grandes empreses cada vuelta con más poder.
Dalgo pue facese a esti respective, anque seya dexar oyer la nuestra voz de protesta por unes decisiones que pretenden acabar coles pequeñes editoriales que nun entren nel xuegu de la voz única de les grandes. Hai un escritu que podemos firmar, pidiendo la vuelta de l’axencia ISBN al dominiu públicu y, poro, a la gratuidá. El que quiera firmar pue facelo, ensin falta de ser profesional del llibru, nel xiguiente enllaz:
