Da gusto, o seya presta, lleer una bona novela depués d’aguantar una mediocre y afamada historia titulada «El primer caso de Unamuno», onde se pretende meter al buenu de don Miguel en faenes policiaques. Seguro que Luis García Jambrina, al que conozo de dirixir unos ·Encuentros de Verines» sobre Lliteratura Infantil y Xuvenil -a los que fui xunto a don Severino Antuña- seguro, repito, que ye un gran especialista na figura y na obra d’Unamuno. Asina nos lo fai saber colocando al final de la novela tola so bibliografía sobre’l Rector salmantín. Pero eso, por desgracia, non lu iluminó a la hora d’escribir una novela policiaca. En fin, falaba, o pretendía falar, d’otra cosa dafechamente estremada: la guapa novela d’una moza, porque moza ye, llamada Beatrice Salvioni.
«La malnacida» ye una neña camín yá de l’adolescencia, pongamos 13 añinos, que vive nuna ciudá de la Lombardía italiana nesos complexos años de 1930 na viéspora de la II Guerra Mundial. Mussolini dándoles toes y embarcando a los italianos, a los probes, claro, a lluchar n’Abisinia, porque ellos tamién queríen ser colonizadores, como los grandes d’Europa. Maddalena, ye bautizada como «la malnacida» porque dicen, los mayores y sobre too los conservadores, que ye un poco bruxa. O más bien mui bruxa, capaz d’echar el mal de güeyu y cuasi sentenciar a muerte a cualquiera que se crucie con ella. Hasta’l puntu qu’ella mesma termina por creyelo por delles casualidaes que-y pasaren na so curtia vida. Pero Maddalena nun ye bruxa ye, eso sí, un espíritu llibre con una presencia cuasi hipnótica que se fai valir ente los de la so edá que-y tienen un gran respetu.
Un día, el so camín crúciase col de Francesca, una neña del so tiempu que pertenez a una clas superior a la d’ella. Los pás de Francesca son comerciantes, mentanto los de Maddalena son obreros ensin cualificar. Pero d’esi alcuentru va a surdir, sobre too per parte de Francesca, una descomanada atraición pola otra mocina. Y asina, tantiando, dando pasinos p’alantre y p’atrás, les dos van a xuntar los sos caminos lo cuál-yos trae una montonera de problemes. L’aniciu de la novela ye mui fuerte, anque llueu baxa’l tonu y el restu la historia trescurre dientro la llende de la rellación normal de dos adolescentes. Y como tresfondu de too ello, ta la situación política y el dolor que la presencia de la guerra n’Afríca va a trayer pa dalgún de los protagonistes.
Hai delles partes de la novela que nos traen l’alcordanza de «La amiga estupenda», d’Elena Ferrante, el primer tomu de la tetraloxía de la escritora napolitana, pero esta «malnacida» ye más primitiva y menos intelectual que los personaxes de la Ferrante, amás que tamos falando d’una novelina curtia, onde nun da llugar a la esplosión lliteraria de la saga de les dos amigues.
«La malnacida» ye, y dicho queda, una novela que se llee con interés, bien escrita y, sobre too, contada dende la perspeutiva d’una edá que l’autora tien cerca, siendo quien a espeyala perfeutamente na so narrativa. Una cosa namás me fadió bastante. Un añadíu que la Salvioni pon, una vuelta yá finada la historia, en forma d’agradecimientos. Escesivos, aburridos ya asonsañando a eses pesaes entregues de premios que vemos pola tele. Sobraba. Polo demás, una nueva escritora de la qu’espero lleer coses interesantes en posteriores entregues.
