La «media vida» nun ye una midida de tiempu, porque nun sabemos cuánto va a durar esa vida. Podría selo si faláremos d’un difuntu, entós sí sería mui fácil de calcular. Afortunadamente nun ye’l casu. Yo creo, entós, que la media vida ye una midida sicolóxica. Un fala d’ella cuando ye consciente de la so adultez, d’una etapa de la so vida que se zarra y d’otra etapa que nun sabemos lo que va durar pero qu’intuimos que yá nun va ser igual. Seguramente nun hai razones oxetives pa ello, siguimos faciendo les mesmes coses que facíemos, tenemos el mesmu trabayu, vivimos cola mesma muyer (o paisano)… pero dalgo cambió dientro de nos. «Sentimos» que dexamos atrás un camín non físicu (o non sólo), sinón lo que dixi enantes: sicolóxicu. ¿El pasu del tiempu? Ensin dubia. Con tolo que trai consigo.
Nun sé si l’amigu Pablo Texón taría d’alcuerdu con estes filosofíes de caleya, porque igual los motivos de llamar «Media vida» a esti trabayu recopilatoriu son mui otres. Pero eso, a fin de cuentes, nun ye importante. Sí lo ye’l fechu de que, a esti altor de la so trayeutoria humana y lliteraria, nos ufierte un resume (o meyor una totalidá) d’esi camín que lleva percorríu. Y lo primero que quiero dicir, y digo, ye que tien que tar mui satisfechu del resultáu. Un par de guapos poemarios, unes traduciones d’un autor importante y un puñáu de canciones escrites a mayor gloria de grupos y cantantes asturianos. Yo diría que ye muncho.
Nun conozo mui bien el caráuter de Pablo Texón, pa eso hai que tener más confianza de la que tengo con él, pero llámame l’atención que, cuando ando rabilando un poco por internet, lleo munches coses suyes que me paecen simpatiquísimes y que gocia d’un sentíu del humor envidiable. Y ensin embargu, la so obra lliteraria ye más bien (cuasi diría dafechamente) ente triste y desesperada. Bueno, igual desesperada ye una pallabra mayor (de les que Borges llamaría «campanuda»), pero cuando menos de gran señaldá. Seguro, de pérdida. O meyor, de pérdides. Porque hai nos sos poemes pérdides d’amores, d’inocencies, de tiempos pasaos que nun volverán. Lo qu’asocede ye que Pablo fala d’elles con suavidá, ensin grandes esparabanes, cuasi col comencimientu de que son normales na vida d’una persona. Col mensaxe subliminal de que nun hai que se facer grandes ilusiones pa llueu nun veles frañaes.
Costaríame trabayu dicir cualos son los poemes que más me prestaron del llibru de Pablo Texón porque, amás, hai como una continuidá na so obra poética. Seguro qu’un especialista estremaría époques y estilos nos dos poemarios, pero yo nun soi un especialista y tampoco ésti ye’l llugar más afayaízu. Abástame con dar cuenta de l’apaición del so llibru, felicitalu pol conteníu, felicitar al editor -Antón García- pola parte que-y toca y recomendar a los que tenéis la moral de lleer esti blogue a que lu merquéis y esfrutéis con él. Y cómo botón d’amuesa, cópiovos el primer poema del primer poemariu. Y ye que, paeceravos una babayada, pero doi muncha importancia a esi primer poema. Quiciás porque, enantes d’él, nun había nada, too taba guardao nel interior del poeta, y ésta ye la so primer voz. Una voz, como veréis, mui guapa.
LO MEYOR DE TOO
Lo meyor de too yera cuando tovía
yeres quien a llevame
a xocostrines
tu l’héroe l’únicu infalible peles
nueches facíemos un enguedeyu
de piernes na cama, yeren pá, ma, Diego,
yera too tan pequeño
que cabía nuna sábana qué prestoso
que too sea tan pequeño que nun
haya más llendes que’l cantu’l colchón
que nun haya más abellugu que’l to brazu
que les nueches nunca sean llargues
nin fríes nin vacíes
lo meyor de
too
yera cuando
too
yera tan cenciello
como trancar la puerta y nun t’afogar
tantes coses yeren lo meyor de too
«Media vida»
Pablo Texón
Ediciones Saltadera, 2017
