Va un tiempu, llamóme l’amigu Ruma Barbero pa entrugame si quería collaborar nun vidiu que preparaben pal homenaxe a Igor Mediu. Esti añu, merecidamente, la Selmana de les Lletres dedícase a la so persona, nel doble sentíu d’historietista y músicu, amás de gran asturianista. Llóxicamente díxe-y que sí. Nun fui a ver el resultáu de la grabación y cuido que saliere bien, pese a qu’aquel día, nel Natahoyu, había munchu vientu y munchu ruíu. Anque lo que falé fue un poco improvisao, respuende más o menos al testu que pongo darréu por si daquién nun pudo ver el vidiu y tien interés en sabelo:
«Bueno yo diría que la mio amistá con Igor Medio fue una amistá d’ida y vuelta. Voi desplicalo: Yo conocía muncho a sos padres, Luis y Sonia, bueno Luis morrió va tiempu y con Sonia sigo calteniendo esa amistá. Pues bien, fue precisamente Sonia, so madre, la qu’un día s’allegó a la cafetería onde yo almorzaba tolos díes y díxome qu’Igor taba escribiendo un comic pa un concursu. Nun sé si yera pala revista “El Llapiceru” o pa otru. Y que nun tenía problema colos dibuxos pero sí dalgunes dificultaes col asturianu. Que nun taba seguru de si lo facía bien o cometía faltes. Y entrugóme si podría yo correxi-y los testos. Díxe-y que sí y entamamos una cosa mui curiosa. Porque resultaba que los nuestros horarios, el d’ella y el míu nun coincidíen, y entós ella dexábame na cafetería un sobre con unes frases y unos diálogos y yo, cuando diba, recoyíalos, correxíalos y volvía a dexar el sobre nel mesmu sitiu. Paecíemos una especie d’espíes d’esos de les noveles de John Le Carré que se pasen mensaxes. Asina escribió Igor aquel primer comic n’asturianu. Nun sé si ganó’l concursu, pero seguro que fue l’aniciu de la so carrera como dibuxante de comics.
Años depués, cuando él yá yera más conocíu, bueno, dientro de lo que se puede ser conocíu n’Asturies, que nun ye
muncho, una editora que se llamaba Editora del Norte encargó unos llibros de redaición pa la escuela. Yera un proyeutu que dirixía Mariano Suárez, gran rapaz y gran profesional de la enseñanza. Yo escribí un d’esos llibros nos que tenía que crear a unos personaxes y facelos movese polos sitios de la vida cotidiana: la escuela, les vacaciones, el supermercáu, el deporte, etc. Y a la hora de buscar un dibuxante p’acompangar los testos, pensóse en Igor. La verdá ye que fizo unos dibuxos guapísimos. Fueron me paez que 40 y toos en color. Una cosa mui mui guapa. Yo quedé encantáu y creo que la editorial tamién. Por si dalguién tien la curiosidá, el llibru titúlase «Los camientos de Deva y Xulián» y debe tar dafechamente escosáu. Llueu él fízome una cartulina de recuerdu, colos personaxes protagonistes que decíen dalgo asina como “Hola, Vicen”, o paecío. D’esi mou, nuna primer etapa yo ayudélu a él colos testos, y llueu nuna segunda ayudóme él con unos dibuxos, por eso digo que la nuestra amistá fue un poco d’ida y vuelta. Añadir pa finar que me paez qu’esti homenaxe ye mui merecíu y que pola mio parte a Igor recordarélu siempre con gran cariñu.»
