«La planta 14»

Esi ye’l títulu d’una guapa canción de Victor Manuel de los años 80, na que se recuerda la muerte de tres mineros con tol dramáticu ambiente qu’arrodia la bocamina y la presencia, non deseada, del patrón. Esti día, y gracies a la siempres benemérita intervención del historiador Rafa R. Valdés, siempre atentu a novedaes, lléganos una prestosísima collaboración ente la guapa voz de la cantante de tonada Marisa Valle Roso y el gran dibuxante Alfonso Zapico (premiu nacional de Comic y autor de moda), que nos ufierta una estremecedora versión de la canción. Los dos artistes, por separao, ya nos emocionaríen, pero sentir los versos na boca de Marisa, mientres vemos la espresividá de los dibuxos d’Alfonso ye tou un luxu que mui pocos paises, fuera d’Asturies, podríen ufiertar. Pa los qu’entovía nun fuisteis a escuchalo, póngovoslo darréu pa que podáis esfrutalo. Nun me deis les gracies, dá-yosles a los que fueron capaces de facelo.