Mayra Montero ye una escritora cubana -La Habana, 1952- que vive en Puerto Rico y tien la nacionalidá norteamericana. Dicen los que la lleeron que la so especialidá ye’l «rellatu eróticu», col que ganó’l famosu premiu de «La sonrisa vertical» («Púrpura y profundo»), anque tamién tien publicaos llibros pa rapazos. Podemos dicir, entós, que tamos delantre una autora de temes variaos, qu’inclui tamién la novela negra o policial.
La verdá ye que «La tarde que Bobby no bajo a jugar» ye la primer obra que cayó nes mios manes, y fue un migayín por casualidá. Y ye que siempre me prestó l’axedrez, anque nun paso de ser un xugador mediocre al que seguro que pueden da-y, ensin que s’entere, el «mate Pastor». Asina que’l fechu que nel títulu apaeza’l nome de «Bobby», fízome pensar que se trataba del gran Bobby Fischer, un de los meyores axedrecistes de tolos tiempos que, en plena «guerra fría», derrotó a tola plana mayor de los xugadores soviéticos (Petrosian, Korchnoi, Tal, Spassky… ) hasta proclamase campeón del mundu en 1972, en Reikiavik (Islandia). De magar esa fecha, decidió esapaecer de la escena mundial, por causes que se discuten pero que nun se conocen, masque yera una persona con un equilibriu mental «inestable». Y que se fartucó de la Federación Internacional d’Axedrez (FIDE) y de tolos cantamañanes que lu arrodiaben.
La novela de Mayra Montero pivota al rodiu del gran Bobby, desendolcando dos guapísimes histories que van solapándose a lo llargo los
socesivos capítulos. Una d’elles ye una historia d’amor «fou», ente un reloxeru cuarentón y la madre de Bobby, y la otra, que podíemos llamar d’iniciación, ente’l propiu Fischer y una adolescente cubana que llueu nos enteramos (enteréme yo, otros seguro que yá lo sabíen) que yera la propia autora. O seya, que yo lleíla creyendo que yera namás ficción, cuando resultó ser una novela autobiográfica. Dame igual, la verdá. Lo que sí puedo dicir ye que se trata d’una novela mui guapa, perbién escrita, enllena de señaldá y reflexones interesantes, y que caltién l’interés a lo llargo de toa ella. La historia (les histories) asítiense en La Habana, y encartien mui bien pa conocer a fondu cómo yera la Cuba de los caberos años de Batista y los primeros años de la Revolución. Nenguna de les dos sal mui bien parada. ¿Y l’axedrez? Pues ta presente a lo llargo toles páxines, pero’l que nun sepa nada del xuegu, nin conoza a nengún de los xugadores que salen, puede lleela perfeutamente y esfrutar cola so llectura. Claro que conocelo siempre ye un plus. Igual por eso me prestó un pocoñín más.
