close
«La verdad sospechosa»

«La verdad sospechosa»

JuanruizTuvi nel Teatru Xovellanos viendo la obra de Juan Ruiz de Alarcón «La verdad sospechosa». Representóla, mui prestosamente, la Compañía Nacional de Teatru Clásicu. Tan prestosamente que, camiento, que la representación tuvo percima de la obra. «La verdad…» cuenta la historia d’un mentirosu compulsivu que, coles sos mentires, introduz a tolos que lu arrodien nuna especie de telaraña na que se ven atrapaos. Él ye’l que más lo sufre, pues emburriáu per eses mentires enfádase col padre, tien de batise en duelu y acaba xuníu a otra muyer en llugar de la qu’él quier.

La obra ye, a cachos simpática y a cachos reflesiva, y vese siempres con interés. En cualquier casu, y pese a que la cadarma que la sofita ta bien construyida, al mio modestu talantar Ruiz de Alarcón nun tien la fondura de Lope, nin la grandiosidá de Calderón, d’ehí esi comentariu de que quiciás la Compañía de Teatru Clásicu tuvo penriba de lo representao. Maxistral l’actor Joaquín Notario nel papel de don Beltrán, padre de don García, el mentirosu compulsivu, que tamién rellumó bien alto. Y perbién Fernando Sansegundo faciendo de Tristán, el criáu/secretariu de García. Pero en conxunto, la docena llarga d’actores intervinientes ficiéronlo mui bien. Tábemos na penúltima fila del teatru y nun se perdía un res de los diálogos y eso que, al ser en versu, siempres supón un grau más de dificultá.

En resume, un aplauso grande pa la Compañía -como-y dio’l públicu puestu en pie- y dalgo menos pa la obra, ensin quita-y méritu al hispano-mexicanu Alarcón porque, qu’una obra del sieglu XVII en versu, pueda ser vista por un espeutador actual ensin aburrise, yá ye grande méritu. El teatru taba a medies, de xuro pola coincidencia col partíu final de la Champions. Una llástima porque l’actu merecería un llenu. Pero yá lo dicía Bujadin Boskov: «Fútbol ser fútbol».