close
Les distintes Patries d’Inaciu Galán

Les distintes Patries d’Inaciu Galán

Presentó Inaciu Galán el so llibru de poesía “Pátria en pallabres menores”, nel llocal de la Librería de Bolsillo de la cai Adosinda. La editorial que-y lu publica ye BaxAmar/ BajAmar, que dirixe l’incombustible al desaliendu César Pascual Ortiz, un exemplu como editor, dispuestu a “tirar p’alantre” ensin esperar ayudes de terceros. Nin de segundos. Namás col so esfuerzu personal y una voluntá a preba d’axentes químicos, que tán -llamentablemente- mui de moda. La presentación corrió a cargu d’Alfonso Martín Sánchez (Fonso), profesor de Griegu y Llatín que, con bon sentíu del humor, faló del autor y de la obra dando unes prestoses pincelaes.

Inaciu Galán ye un dinamizador de la cultura asturiana. Dende la organización que preside, “Iniciativa pol Asturianu”, fai un llabor beneméritu asesorando, denunciando y entamando actividaes sobre too al rodiu de la llingua, pero non sólo d’ella. Da clases, ye periodista, fundador de revistes y, amás, tovía tien tiempu pa escribir. Debería danos la receta.

Esti últimu llibru suyu ye, como digo, un poemariu. Encadarmáu en tres grandes faces: “Patria en pallabres llentes”, “Patria en pallabres vives” y “Patria en pallabres de tierra”, resulta un percorríu poles tierras y los paisaxes de la otra Patria que tien. La daveres. La grande: Asturies. Si ye verdá, como diz Pessoa, que la patria ye la llingua, Inaciu aprovéchala pa falar, con fondura y sentir, d’esa otra que nos contién, que nos conforma, que nos fai ser como somos, anque toos seamos distintos. Esi raigañu común que tenemos los asturianos y al que nun renunciamos anque tuviéremos a miles de kilómetros d’ella, como pasa colos emigrantes de tol mundu. Asturies siempre ta presente.

Asina, l’autor tien poemes a la Mar, al Puertu, a la Sablera. Al Carbayu, al Texu, a la Pumarada y tamién a esos Escayos que “pinchen na memoria de mio” porque agora, col pasu de tiempu, los caminos y caleyes pelos qu’anduvieron los sos antepasaos, tán cubiertos d’ellos en señal d’abandonu. El pasu del tiempu, la señaldá de reconocer que yá nun somos neños, (“y pasaba les tardes xugando/ medrando pasu ente pasu/ y ensin sabelo/ dexando atrás al neñu que yera”), l’amor a les coses materiales que fueron patrimoniu de los nuestros mayores (les madreñes, l’horru, el molín, el tendayu…), l’alcordanza de los llugares siempre visitaos antes que nós (el chigre, el llagar, el vieyu camín, la fontana…) van filvanando pasu ente pasu, ensin priesa, esti poemariu d’amor a la tierra. La suya y la nuestra. Esa patria qu’Inaciu esmenuza y que llueu recompón pa formar un too al que tantos de nosotros nos sentimos arreyaos. La del himnu que principia, “Asturies, Patria querida…”. Norabona, pues, a Inaciu Galán y que siga trabayando por y pa esa tierra a la que lleva tan adientro.

CAMÍN

L’atayu ye inútil.
Ye esi camín,
el de les vaques que t’asustaben,
el de les mores de setiembre
y les ortigues que tanto picaben.

Un camín onde mandaben les vaques
y agora manden los escayos,
ganando tarrén
gracies a un pueblu que muerre.