Esti añu la parte lliteraria del Arcu Atlánticu ta dedicada a Jules Verne, una dedicatoria bien merecía. Nun quixi participar na mesa redonda a la que taba invitáu, por causes personales. Nun taba pa la mano. Pero nun quiero dexar pasar l’eventu ensin poner cuatro pallabres del autor francés.
Con elli cúmplese esi determinismu que, dacuando, paez tener el Destín (¡va por ti, Rosa!), y que consiste en que, por más idegues o proyeutos qu’un faiga, a la fin ye esi paisanu, mazcaráu de futuru, el qu’escueye por ti. Porque Verne escoyó pal so futuru la carrera de Derechu, ya inclusive exerció como abogáu, pero esi nun yera’l so camín. Cuando atalantó que la cosa pasaba pola escritura, principió a publicar unes noveles «series» que a naide interesaron, y tuvo qu’aportar esa primer novela d’aventures, «Cinco selmanes en globu», p’algamar el trunfu y la popularidá que yá nunca lu dexaríen d’acompañar nel restu la so vida. ¿Ye eso’l Destín? Si nun lo ye aseméyase-y abondo.
Verne fue un pioneru. Pue dicise que fue’l padre d’esi xéneru que llueu pasó a llamase la «ciencia-ficción». Por cierto,
munches veces llamen asina a coses que nun son más que «fantasía». Nun ye lo mesmo. La CF tien de tener una cierta fantasía, pero siempres mui arreyada a un determináu altor científicu. Con Verne eso cúmplese dafechu. En cuasi toles noveles de so, apaecen teoríes o aparatos que tienen rellación cola ciencia de la so época. Tamién «inventó» dalgunes, pero la mayoría yá esistíen anque tuvieren «nel trubiecu».
Nun ye Verne l’autor que más me presta nesi xéneru. Ya falé otres veces de Bradbury, de Matheson… pero, claro, estos son más cercanos nel tiempu. Verne ye la prehistoria. Ye’l Sidrón de lo que vieno llueu y tolos demás-y deben muncho. Los llectores tamién. Quiciás los personaxes de Verne son un poco «planos», n’él, nes sos noveles, lo que cuenta ye l’aventura, lo que pasa, más qu’una descripción de los personaxes. Inclusive’l más trabayáu de toos, el Capitán Nemo, tien más de misteriosu que de profundu. Quiciás lo que yo más pudiere destacar de los llibros de don Jules, si ye que pudiere estremase dalgo asina pues tien munches coses destacables, ye que tán escritos «con sentíu común». Ye dicir que, anque l’aventura pueda paecer inverosimil, siempre tien un filu de racionalidá que la fai, dientro d’unes coordenaes, posible. Bueno, por dicir dalgo.
En fin, bienveníu seya’l prolíficu y cinematográficu autor francés a la nuestra tierra asturiana. Merez esti homenaxe que se-y fai, y munchos más. Pa finar, dicir que’l primer llibru que se-y publicó n’asturianu fue «L’eternu Adán», tornáu por Dolfo Camilo Díaz y que se publicó na Coleición Xuvenil de l’ALLA. El direutor de la coleición ye un tal García Oliva (perdón).
