N’efeutu, esti añu cúmplese’l 40 aniversariu d’una obra que, al mio modestu xuiciu, marca un enantes y un depués no que damos en llamar la Lliteratura Intantil y Xuvenil (LLIX). Y curiosamente nun se trata d’un cuentu, nin una novela, un llibru de poemes o una obra de teatru: ye un llibru d’ensayu.
Nel añu 1973, la editorial italiana Enaudi, espublizaba’l llibru «Grammatica de la fantasía» cuyu autor yera Gianni Rodari. Rodari, maestru, periodista, escritor y pedagogu, fue pese a lo so curtia vida (morrió con 59 años) una de les persones que más fizo pola lliteratura infantil yxuvenil. Entovía güei, a trenta y tantos años del fallecimientu, la so personalidá y les sos aportaciones siguen éstudiándose en congresos y reuniones de tol mundu. Y ensin embargu, les aportaciones de Rodari nun son grandes estudios teóricos, nin complexos trataos sicolóxicos al rodiu del mundu de los neños. Tolo contrario, son coses cencielles empobinaes a facer que’l neñu s’interese pola llectura, que participe d’ella, y qu’él mesmu (el neñu o la neña) seyan capaces tamién d’inventar histories. De lo muncho que tien escrito, abúltame que lo meyor, lo más práutico, ta recoyío nesa «Gramática de la fantasía» que yo tengo como un de los mios llibros de cabecera.
Y ye que los secretos de Gianni Rodari son secretos al alto la lleva: el humor, la fantasía, la llibertá conceptual y d’espresión y
sobre too, el xuegu, componen les blimes coles que l’autor italianu fai los sos maraviosos cestos. Na so «Gramática…» enséñase a inventar un cuentu col «binómiu fantásticu». A llanzar una piedra/pallabra nel estanque de la lliteratura. A entrugase (y contestase) «qué pasaría sí…». A construyir un limerick o una cosadiella. A xugar col «erru creativu». A «enquivocar hestories» o a poner les fábules al revés. Porque la Gramática de Rodari nun ye una gramática aburrida, d’eses que tanto-yos presten a los filólogos, sinón tolo contrario. Ye un llibru, sí, pal aprendizaxe, pero pa otru tipu d’aprendizaxe: el que t’avera al mundu de los neños. Esi mundu qu’un día perdimos y yá nunca más fuimos a recuperar. Un mundu nel qu’entovía too ye posible, inclusive la paz mundial, la fin de la esplotación infantil y de les muyeres, el despreciu a los lladrones, «chorizos» y corruptos… toes eses coses que nel nuestru mundu, el de los mayores, paecen imposibles d’esaniciar, quiciás porque nun tengamos la integridá necesaria pa ello.
Bienveníu esti aniversariu d’un de los grandes llibros, d’un de los grandes autores contemporanios, anque nun figure en nenguna antoloxía, diccionariu o enciclopedia d’escritores «serios». Allá ellos, los antoloxístes, los enciclopedistes y los «diccionaristes» (esta pallabra-y encantaría a Rodari), porque ellos se lo pierden. Los que lu conocemos nunca lu dexaremos marchar de la nuestra compaña, porque ye un estraordinariu compañeru de viaxe. Anque seya pa dir al País de Nunca Inxamás.
