Igual hai munchos xixoneses que, si se-yos preguntase, nun sabríen dicir quién fue Julián Ayesta. Nun ye d’estrañar. Nun fue un paisanu famosu, anque si conocíu en dalgunos ámbitos, y la so obra lliteraria nun pasó d’una novelina y dalgunes obres de teatru escasamente representaes. Y, ensin embargu, esa pequeña novela ye una ayalguina qu’entronca dafechu coles vivencies d’una xeneración de mozos y moces que vivieron (vivimos) el Xixón de metanes del sieglu pasáu. «Helena o el mar del verano» recueye les breves memories, la curtia evocación del rapaz protagonista, a lo llargo de dos veranos, nel marcu incomparable d’un Xixón onde la playa, los praos aledaños, los merenderos, la casona natal y eses comides familiares con amplia participación de tíos, primos, primes y el cura de la parroquia onde se cuntaben anéudotes, se falaba del Sporting o se echaben unos cantarinos al finalizar, dexaben un recuerdu imborrable d’una época irrepetible, cuando teníemos pocos años y «tola vida per delantre».
Yo camiento que la memoria personal vive somorguiada, entemecía, dientro d’una memoria más grande que podríemos llamar xeneracional. Quiero dicir, y digo, que munches coses qu’inclusive nosotros nun vivimos personalmente les facemos nuestres porque tán dientro d’esos recuerdos xeneracionales qu’asumimos como nuestros. ¿Memoria coleutiva? Podría ser una forma de llamalo pero, dende llueu, ye dalgo que nos estrema, que nos diferencia d’otres xeneraciones anteriores y posteriores que tuvieron otres vivencies.
Ayesta coneuta cola mio sensibilidá y colos mios recuerdos de les riñes familiares, de les recomendaciones de los
mayores («pa bañase hai qu’esperar dos hores pa la dixestión…») y les alvertencies de les que nos reíemos y que siempres pasábemos por alto. Tamién d’esos primeros namoramientos, de la idealización d’esa mano femenina que garrábemos na playa o na fiesta del pueblu creyendo que diba a ser el nuestru amor eternu. Y llueu de los remordimientos que nos llantaben los cures nel nuestru tienru maxín, menaciándonos coles flames del infiernu pola nuestra concupiscencia, que nunca supimos mui bien lo que yera.
«Helena o el mar del verano» ye una novelina que nun puede cuntase, hai que la lleer porque ye una lliteratura que nun entra pol maxín, sinón polos sentíos. Y al lleela un siente la señaldá d’aquellos veranos infinitos perdíos va munchu tiempu, onde los amorinos, los amigos, la playa, la mar, los merenderos de Somió o La Guía y l’abellugu placenteru d’una familia querida dexaron una fonda marca nos nuestros corazones. Gracies a Maria Elvira Muñiz, la querida Marial que, va munchos años me descubrió al so amigu Julián Ayesta, al qu’agora relleo:
“…y todo era como un gran arco y nosotros lo íbamos pasando y al otro lado estaba nuestro mundo y nuestro tiempo y nuestro sol y nuestra luz y nuestra noche y estrellas y montes y pájaros y siempre…“.
Nota.- Julián Ayesta (Xixón, 1919-1996) fue escritor y diplomáticu. Collaboró n’importantes revistes lliteraries (Garcilaso, Acanto…) y, curiosamente, l’únicu embaxador español en Yugoslavia, pues primero nun había rellaciones diplomátiques y llueu l’estáu se desfizo. «Helena o el mar del verano» ye la so única novela y la última edición, del añu 2000, ye de «Acantilado».
