Un añu más siéntome delantre la “tele” a ver la entrega de los premios Goya. Una entrega que nunca nun aguanto hasta’l final polo llarga que ye, y sobre too, lo repititiva. Y ye qu’un termina fartucu de tantu saludu a los pás, más y coleguis y d’esa actitú que quier ser de dignidá, pero que termina resultando llorosa y pidiona escontra unos poderes que –según repiten- tiénenlos desdexaos de la man de Dios.
Ye verdá, porque lo ye, que’l señor (por llamalu de dalgún mou) Wert ye un impresentable que nun tien repaxolera idea de cómo se tien d’articular una política cultural y educativa decente. A estes altures de la película –vien mui a cuentu- ta yá más caláu que’l Titanic y tol mundu conoz de la so incompetencia y la so gran capacidá pa meter la pata. Entiendo qu’a naide-y presta que lu insulten, pero eso ye dalgo que vien col cargu. Si nun quies esponete al xuiciu –por inxustu que fuere- de la xente, nun tas preparáu pa la política. Mas n’esti casu en que ye dafechamente xustificáu. Y qué dicir d’esi IVA cultural qu’encarez la cultura más popular –cine, llibros, teatru…- y abarata’l comerciu d’obres d’arte, en manes d’unes minoríes con gran patrimoniu. La inxusticia ye manifiesta.
Pero dicho too esto que, por otru llau ye dalgo persabío y permasuñao, la verdá ye que la imaxen que’l gremiu cinematográficu da ye la de dalgo zarrao, autocomplaciente, acrítico y un poco de “pasarela Cibeles”. Ye verdá qu’hubo delles alusiones al tema del albuertu y dalguna cosina más, pero too ello mui “de salón”. Yo eché en falta, por exemplu, dalguna referencia a esos catorce seres humanos que morrieron a les puertes d’España, una cadena de muertos que merecería dalgún ilustre comentariu, aprovechando esa plataforma tan afayaíza de la “tele” en másima audiencia. Y repúnenme abondo toes eses referencies a la “heroicidá” de facer una película, o a lo “surrealista” que ye dedicase al cine nestes condiciones. Lo que ye vramente heróico ye lo que tán faciendo los familiares de los enfermos dependientes pa poder atendelos, y lo que ye surrealista ye, por exemplu, la situación de munchos inmigrantes que por quitar, ya-yos quitaron hasta los drechos de tener salú nunes condiciones dignes.
Nun quiero xulgar la calidá del cine español porque, la verdá, nun veo muncho. Igual ye tan bono como ellos mesmos
valoren. Pero hai un signu que fala nel sentíu contrariu: nunca veo películes españoles nos grandes festivales europeos: La Berlinale, Cannes, Venecia… a nun ser en pequeñes muestres collaterales. Igual ye que nos tienen manía. En fin, sé que munchos fachas aprovechen esti actu pa “cargar” escontra la clas cineasta, diciendo munches fataes. Creo que toi llibre de sospecha: el mio fíu Xuan estudió Cinematografía, y fizo cursos en La Habana. La mio sobrina Eva Lesmes tien en Madrid un llocal-Taller pa estudios d’actor, guionista, etc. El mio sobrín Diego Lesmes dirixe, dende va munchos años, series na TV. (“Amor en tiempos difíciles” o como se llame agora), y yo mesmu tengo ganao’l premiu más importante de Guión a nivel estatal, como ye’l Premiu Pilar Miró, a medies cola mio sobrina.Por cierto, editáu con un Prólogu de Jaime de Armiñán. Podía, pues, dicir que soi de la profesión. Pero nunca m’identifico con esi desfile autocomplaciente y llorón d’una profesión que siempre ta mirándose l’embeligru.
P.S.- Lo del “Oh” del títulu ye que m’estraña muncho que, ente los premios de teatru asturianu qu’acaben de dase, nun figure esi maraviosu “Llázaru de Tormes” del gran Cellero. Munches coses bones tien qu’haber entós.
