Non, nesta ocasión nun voi referime al guapísimu picu Monsacru, nel conceyu de Morcín, sinón al llibru recién publicáu por Xuan Xosé Sánchez Vicente que lleva’l mesmu nome. Trátase d’un volume sotituláu «Estudios lliterarios», que recueye un total de 10 ensayos enriestraos pol tema de la nuestra lliteratura, a esceición d’un (el tituláu El doncel de don Enrique el Doliente). De los otros, un par d’ellos ocúpense de los clásicos, dándo-y a la pallabra una aceición que quiciás nun-y correspuende, puesto qu’un de los dos trata’l tema de don Enrique García-Rendueles, que ye más bien un escritor cuasi contemporáneu, mentanto que l’otru ye un mui interesante estudiu sobre Xuan María Acebal. Nesti segundu, Sánchez Vicente fai la comparanza ente dos de les sos más famoses obres: Per un llau la conocidísma «Cantar y más cantar», y per otru la muncho menos conocida, La vida del aldeanu, qu’espublizó l’Academia nel añu 2002, inédita hasta esa fecha. El resultáu de la dicha comparanza ye que la segunda resulta ser una palinodia de la primera, o seya, que vien a dicir tolo contrario que dixo na anterior: lo que na primera yera una maravía d’armonía y belleza, y los aldeanos vivíen perfeutamente inxertaos nesa armonía, na segunda ye too puerco y desagradable, y los paisanos trabayen como burros pa nun ganar cuasi nada. L’estudiu esmenuza dambos poemes y va sacando conclusiones, nun sólo temátiques sinón estilístiques y d’otra mena. Un trabayu interesante.
El restu los estudios faen referencia a temes y autores de la lliteratura del Surdimientu: A ocho poemes d’Antón García;
a tres cuentos de Milio Rodríguez Cueto; a la obra de dos muyeres poetes, María Teresa González y Berta Piñán; y llueu a trabayos más globales, tanto de los primeros años del Surdimientu, como a temes más d’última hora.
El resultáu de too ello ye un llibru perinteresante, qu’habrá d’amestase a la yá estensísima obra d’esti autor, figura imprescindible en toles estayes de la nuestra lliteratura, tanto d’ autor de creación, como d’ensayista ya investigador. Anque los trabayos qu’inclui esti volume, yá fueren toos publicaos en diversos medios que l’autor enumera al final, eso nun-y quita nengún interés al llibru, sinón al contrario. Ye un mou de que nun se pierdan, y poder echar mano d’ellos con más facilidá a la hora de facer cualquier trabayu sobre la nuestra lliteratura.
