Tuvo de llegar un aniversariu pa que la xente volviere a recordar a la gran escritora y meyor persona que fue la catalana Montserrat Roig. Cúmplense agora los 30 años del so fallecimientu cuando namás contaba con 45. Intelectual, feminista, catalanista ensin los escesos qu’agora se lleven, caltuvo siempre una actitú de defensa de los desfavorecíos más que l’aprosimación al nucleu familiar de los Pujol que yeren los que repartíen los carnets de buenos o malos catalanes, d’ehí la so militancia nel PSUC que llueu abandonaría con un ciertu desencantu.
De les sos munches dedicaciones quédome cola de novelista. Entovía tengo por casa, pese a les munches entraes y salides de la biblioteca, “Tiempo de cerezas” y “La hora violeta”. Lleí dalguna otra, agora en paraderu desconocíu. La so llectura siempre me dexaba un tastu de señaldá, como si de dalgún mou hubiere una querencia a la so temprana muerte.
Tengo, amás, un recuerdu personal al rodiu d’ella y en favor de la llingua asturiana. Coincidimos nel añu 1987 nunos “Encuentros de Verines”, en Pendueles, que se dedicaben al “Cuentu”. Yo formaba parte d’un grupu d’escritores asturianos encabezaos por Álvaro Ruiz de la Peña, ente los que taben tamién Sánchez Vicente, Antón García, Dolfo Camilo Díaz y, en castellán, Juan José Plans. Pese a que l’ambiente fue prestosu, nun de los alderiques Juan José Millás, un poco en plan señoritu madrileñu, minusvaloró un migayín al asturianu, quiciás porque d’aquella entovía nun tenía munchu cultivu lliterariu modernu. Los asturianos picámonos abondo ya inclusive dimos voces, hasta que Montserrat Roig (y tamién el gallegu Carlos Casares) intervino encesamente nel nuestru favor lo que finiquitó l’alderique que yá nun se retomó. Siempre-y lo agradecí muncho.
Y esta ye la mio modesta alcordanza d’esa importante escritora, abúltame qu’inxustamente escaecida, que fue Montserrat Roig. ¡Oxalá qu’esti cabudañu encartie pa que la so obra y la so persona tornen a ser recordaos!
(Semeya: Pilar Aymerich)
