A una edá mui moza, namái 48 años, morrió esti pasáu martes 19 l’escritor mierense Xavier Vilareyo. Home polivalente, tanto na escritura -facíalo igual n’asturianu que n’eonaviego- como na so dedicación pues fue, ente otres actividaes, un de los entamadores del Festival de Cine Asturianu. Caltenía unes postures mui personales en dellos temes, como la so visión sobre les Asturies de Santillana, anque la verdá ye que nun tuvi oportunidá de tratalu muncho. Nuna de les ediciones del Festival de Cine Asturianu invitóme a participar como guionista, yá qu’una de les películes a concursu -la que ganó’l Primer Premiu nel añu 2007- yera La noche del escorpión, basada na mio novela L’aire de les castañes, dirixida por Eva Lesmes ya interpretada nel papel de Rambal -na peli llamábase Kiki- por Miki Molina. Refugué l’asistencia porque en realidá yo nun ficiere’l guión, y amás nun taba mui conforme de cómo quedare, asina que nun me paecía ético participar nel eventu. Creo que falemos un par de veces más pa otres coses, pero esi fue tol mio contautu personal con Vilareyo. En cualquier casu siento la so muerte tan temprana, pues seguro qu’entá-y quedaríen munches coses qu’aportar a la cultura y la llingua del nuestru País. El mio más sentíu pésame pa los familiares y que la tierra-y sea leve.
