El día 21 d’esti mes cellebróse’l Día Internacional de la Llingua Materna. Podíen dicise munches coses al rodiu d’elli, pero abúltame que’l meyor reconocimientu que-y podemos facer ye’l so usu. Asina que, darréu, póngovos un micro-cuentu qu’escribí inspiráu nel sensacional aniciu de la película «2001 Una odisea del espacio» de Kubrick. Que vos preste.
«2001»
Lo primero fue como un escuru pensamientu que-y llegó hasta’l maxín. Un retazu d’idea. Una filtraya d’intelixencia derrompiendo sieglos y sieglos de negrura, de vezos repitíos, d’ inhumanidá. Dalgo que salió d’un interior hasta agora desconocíu, pero que diba ser un ventanu hacia’l futuru. El gran monu garró’l güesu cola mano (¿pero podemos falar yá de mano?) y golpió con toles sos fuerces enriba’l montón. L’efeutu fue arrasador. Mortíferu. Miró pa la tribu estranxera y supo que la victoria yera suya. Y entós gritó con tol alma. Un gritu de poder, de trunfu. Yo, dende l’asientu del cine, respiguéme al comprender perfeutamente por qué llegáramos hasta la Bomba Atómica.
