La presentación na llibrería La Buena Letra de la novela Tyan, del «trubiecu» (de Trubia) Nel Morán, sirvió pa varies coses. En primer llugar pa recordar a los rapazos asesinaos unes hores enantes nos Estaos Xuníos, condenar estes sociedaes tan violentes que tamos creando y dedica-yos, como homenaxe, esi pequeñu actu cultural que va nel camín contrariu: el de los llibros, la cultura, l’entendimientu, les idees… L’únicu mundu que pue facer frente al otru.
Na mio intervención comenté la moda que lleva tiempu imperando dientro la Lliteratura Infantil y Xuvenil (Llix) de lo políticamente correuto, y los temes rellacionaos cola educación y la socialización de los neños. N’efeutu, la mayoría los protagonistes de les noveles xuveniles son agora neños marxinaos, inmigrantes, families desestructuraes, como si quixeren compensar de dalgún mou les llácares d’estes sociedaes capitalistes que namás que-yos interesen les perres y les plusvalíes. Les persones son mercancíes. Pero eso, que ta bien que se sepa, nun pue ser l’únicu oxetivu moralizante d’unos llibros que lo primero que tienen que ser ye lliteratura, buena lliteratura, y non tanto la denuncia d’unes carencies que tienen de tener otres víes de salida: la familia, la escuela… Por poner un exemplu d’estos díes, acaba fallase’l premiu más importante de LLIX n’España, el Premiu Edebé de Lliteratura Infantil, que trata -y lleo- «Omar es un niño huérfano que se ha escapado del centro de refugiados…» Perehí van les coses.
Lo mesmo asocede colos otros temes recurrentes de la última LLIX, los de la socialización y educación. Temes que deberíen tratase ente pás y fíos, o comentase na escuela colos profesores, soluciónense sacando un llibru que trate d’ello. Ye lo que la escritora y crítica Ana Garralón llama «el complexu de SuperLlix»: si el so fíu tien que dexar el chupu o los pañales: SuperLlix al ataque, y sácase un llibru. La so fía nun controla los esfínteres: SuperLlix al ataque. Nun duerme pola nueche: SuperLlix al ataque. En llugar de diálogu ta creándose una lliteratura infantil y xuvenil utilitarista, prauticista, teledirixida…
Tyan, de Nel Moran, ye una novela con otros valores, los de les buenes llectures pa rapazos. Una interesante historia d’aventures, colos sos buenos y los sos malos. Col so sentíu del humor y con una intertextualidá que mecia al Señor de los Aniellos, cola Guerra de les Galaxies, y hasta con toques de Fontenebrosa. Xunto a eso, unes mui guapes pincelaes mitolóxiques y unos protagonistes simpáticos y ocurrentes. En total, humor, aventura, compañerismu, aición… Paga la pena pasar una temporadina en Tyan, un país n’otra realidá distinta de la nuestra, na compaña de Xurde, Enol, Ximena y Xelina p’aidalos a acabar colos malos malísimos de la Corporación. Si cuntamos, amás, con unes mui prestoses ilustraciones de Berto Álvarez Peña, ye un viaxe completu. Sacái los billetes.
