Tuvi l’honor de ser xuráu del prestixosu premio Tiadoru Cuesta qu’entama’l Conceyu de Mieres. Asina, acompañé a Esther Prieto, Xuan Bello, Mael González Arias y Mª Antonia Pedregal que, por unanimidá, pensamos que’l poemariu «En campu abiertu», embaxo l’alcuñu de «Lescar» , yera’l meyor de toos. Nel mio casu particular, con abonda diferencia sobre los demás. Trátase d’un poemariu mui homoxeneu, con media docena de poemes guapísimos y un nivel mediu mui altu. Abierta la plica, resultó pertenecer a Ángeles Carbajal, a la que nun tengo’l gustu de conocer nin de tener lleído. Pero voi tratar de recuperar el tiempu perdíu y buscar otres coses suyes, porque ye una voz fecha, madura y personal, distinta a otres que ye de lo que se trata. N’espera de que se publique’l poemariu ganador, tómome la llicencia de trescribir un de los poemes de «En campu abiertu», esperando que naide s’enfade por ello. Ye una guapísima forma de despidir l’añu ¡Feliz 2013!
TORNA
Voi alcontrate otra vez. Sabré que yes tu
magar que ya nun teas onde siempre
nin tengas el to cuerpu nin el to arume.
Recuérdote agora como una fueya prendía
nun corredor escuru onde ta sola y sabe
que yá nun será suya nenguna primavera.
Una tuvo, una perdió.
Cuando namás me queden
que l’asombru y la sombra,
el desdén de los ruíos de fuera,
voi volver alcontrate;
que son los díes moliniellos del vientu,
un caprichu de l’aire, de dios, del diañu.
Allegaraste na hora afilada
na qu’ensin recordate siquiera
te pierda’l perdeme.
