close
Nuevos tiempos pa los llibros

Nuevos tiempos pa los llibros

Esa señora tan famosa, conocida nel mundu enteru pol nome de «doña Crisis», ta sascudiendo cola «civiella» a tolos oficios, profesiones y negocios de tal mou que, munchos d’ellos, incapaces de siguir desendolcando la so actividá, vense forzaos a zarrar, a desapaecer. El negociu qu’esiste al rodiu del llibru (de los llibros) nun sólo nun ye una esceición, sinón que, pol so calter de «non imprescindible» (sobre lo qu’habría muncho que falar, pues el llibru ye tan necesariu como l’alimentu) la xente suele ser de lo que primero prescinde.

Esto que digo vese grandemente aumentao «en provincies», lloñe de los grandes centros editoriales (Madrid, Barcelona) y de los grandes escaparates y centros de decisión. Baste con repasar les dificultaes que n’Asturies tán teniendo les editoriales (tanto n’Asturianu como en Castellán) y el socesivu zarre de llibreríes, dalgunes d’elles con gran «solera» y que llograren aguantar otres situaciones menos difíciles (Alborá, Trabe, Paraxuga…) Too ello supón un pilancu añadíu, nun sólo al espardimientu de la cultura en xeneral, sinón, lo que a min me preocupa más, la «nuestra» cultura y, per ende, la nuestra llingua. 

Pero otres editoriales, modestes en presupuestos que non en calidá, deciden facer frente a esa «indeseable» señora echándo-y valor ya imaxinación a les sos actividaes. Esi ye’l casu de la exemplar «Pintar-Pintar» que, pesie a ganar importantes premios nacionales d’edición, residiendo equí n’Asturies, decide camudar la so forma tradicional de venta y «re-inventase» abandonando el sistema tradicional de llibrería-llocal , pol de llibrería-virtual.

Asina, l’anuncia del cese del negociu que tenía na Plaza de Concha Heres, n’Uviéu, nun supón, nin muncho menos, l’abandonu de la profesión, sinón una forma de remocicase y de facese competitivos. Poro, dende esti modestu blogue, deseámos-yos a Ángela, Isidro y Ester tola suerte del mundu porque ye lo único que-yos falta: trabayu y calidá tiénenlos a fargataes. Y a vosotros, amigos que dacuando visitáis esti sitiu, dicivos que vos deis una revolada pol so catálagu on-line (www.pintar-pintar.com) aprovechando, amás, que tán liquidando al 50%, lo que ye una ufierta única. Ente tolo muncho qu’hai pa escoyer ta, por exemplu, el d’un tal García Oliva, «Deva y yo», que ye ún de los que más me presta. Y esto nun ye publicidá. (No home non…)