CRÓNIQUES DE LA «MARCA DEL ESTE».- Acaba llegame’l II volume de les «Crónicas de la «Marca del Este», conxuntu de 16 rellatos d’otros tantos «cronistes», sofitáu nel xuegu de «rol» «La Marca del Este». Son toes elles histories de lo que se llama «Fantasía épica», pero tamién d’otres munches maneres, como «espada y bruxería», etc. Yo participo n’Antoloxía con un cuentu tituláu: Lena de Maliayo, que ye la continuación del qu’escribí nel I volume que se titulaba: Más allá y cuntaba les aventures (más bien desventures) de Ástor de Maliayo. Ya sé que podíeis entrugaros, ¿qué fai un veteranu como yo escribiendo estes coses tan frikis? Lo que puedo diciros ye que me presta pola vida escribir esti tipu de lliteratura y, amás, que me rexuvenez abondo compartir histories con xente mozo como los que formen esti equipu. Xente que, amás, escribe mui bien. Si tenéis la posibilidá de faceros col llibru, veréislo. Por cierto, hai otru rellatu d’escritor asturianu: Encuentro en el Bosque Viejo, de Mauro García-Oliva. Mui prestosu.(Holocubierta Ediciones. Diciembre 2011. 414 páxines. Na Casa del Llibru y tamién pue pidise per corréu ensin gastos)
ALABÍN, BON, BAN, VA A EDITASE EN CASTELLÁN.- Esti pareáu sirve pa cuntavos que, n’efeutu, la editorial colombiana «Libros & Libros, S.A.» acaba de comunicame la noticia de que van a editar, pa esti añu 2012, una edición de la novela qu’espublicé en llingua asturiana na Coleición Xuvenil de l’Academia de la Llingua Asturiana. Esta mesma editora ya me tien publicada la novela La hija de la leona, y ta a puntu de salir (creo que pal mes que vien), la edición pal mercáu colombianu y llatinoamericanu d’ Elemental, querida Elisa, que tamién s’espublizó (Trabe) n’asturianu. Estes noveles nun se distribuyen pa España, pero si daquién tien el morbosu deseyu de teneles, pue
pidiles a la propia editorial per corréu.
CUENTU PA FACER UN CURTIUMETRAXE.- Una productora cinematográfica asturiana (nun voi dicir el nome por prudencia), ta interesada en «guionizar» el mio cuentu Carta de Cuba, que fue’l ganador del premiu Fundación Juan Muñiz Zapico de cuentos mineros, nel añu 2005. La cosa ta dando los primeros pasos, pero a la vista de la seriedá d’esta xente, la idea tien pinta de salir alantre. Continuaremos informando.
NUEVA CONVOCATORIA PAL «LLETRES LLITERARIU».- Como dende va yá un tiempu, al empar col Día de les Lletres Asturianes qu’entama l’Academia, sal a la lluz un númberu estraordinariu de la revista «Lletres Lliterariu». Ye la única publicación onde puen compartir «andamiu» xente qu’empieza, con xente yá más o menos «consagrao», siempre qu’haya un ciertu nivel de calidá. Dalgunos escritores refuguen participar na revista porque debe paece-yos de mal gustu compartir páxines con xente nuevo. Nun s’alcuerden que, la mayoría d’ellos, salieron precisamente de les páxines d’esta revista. Ehí tán les hemeroteques con los númberos atrasaos pa demostralo. Yo, en cambiu, toi encantáu de tan «fresca» compaña porque, amás, muncha d’esa xente principiante, dientro d’un tiempu van ser los «consagraos» del futuru. Yá tengo preparaos un par de «minicuentos» pa unviar a l’Academia. A los que vos presta escribir dígovos: «¡animáivos!»
