UNA VERAZ Y CENCIELLA HISTORIA.- Hai munches coses curioses (nos dos sentíos de la pallabra) nesta novela del autor «norteamericanu» Peter Harris. La primera que’l tal Harris, ñacíu en San Antonio de la Florida en 1951, según se diz nel propiu llibru, nun esiste. Trátase del acuñu d’un autor español, bastante conocíu, cuyo nome verdaderu ye José Calvo Poyato. La verdá ye que m’enteré d’esti datu depués de finar la novela y nun dexaba d’estrañame lo bien documentada que taba na parte que cinca a España, persabiendo la idea que munchos autores americanos tienen del nuestru país. Un ciertu antepasáu español que figura na imaxinaria biografía, pudiere xustificar dichu tratamientu. Agora ta más claro too.
El títulu de la novela fai referencia a una verdadera operación militar que tuvo programada, allá pelos años 40 del pasáu sieglu, por parte l’exércitu alemán, pa invadir Gibraltar y, d’esi mou, cortar los suministros que-y llegaben a los ingleses pel Mediterraniu. Pa ello yera menester qu’España entrare’n guerra pa poder, dende la península, executar l’ataque, yá que dende’l mar yera cuasi imposible. La operación estropióse porque Hitler nun llogró l’asentimientu de Franco que, cuciamente, dio llargues al asuntu hasta que dexó d’interesar. De toes maneres la cosa tuvo a puntu de facese ya igual hubiere cambiao’l destín de la II Guerra Mundial.
D’esto trata la novela de Peter Harris (o Calvo Poyato) que lo cuenta con veracidá y cenciellez, narrando los fechos de mou mui direutu, ensin grandes digresiones a les que se prestaba un tema tan ricu como’l de la guerra mundial. Utiliza pa ello dos escenarios: un n’Alemania protagonizáu pol xeneral de la Wermacht Alfred Jodl, que ye l’estratega que planifica la operación en gran secretu. Un personaxe ricu en matices pues ye un militar de carrera al que nun-y presten los métodos violentos de los nazis. Y la so muyer, persona que vien de la nobleza alemana, trágalos entovía menos. Y perehí anden tamién los espíes ingleses tratando de saber lo que se cuez pa dar cuenta d’ello, nunes condiciones de munchu riesgu. El segundu escenariu ye n’España, onde un soldáu republicanu -Leandro San Martín- que vive con identidá falsa pa evitar represalies, ye contautáu por un antiguu xefe suyu pa encarga-y la misión de facer fracasar la supuesta invasión alemana. L’ambiente de la posguerra española ta mui bien espeyáu y los personaxes son dafechamente creyibles. Hai amores, traiciones y un ciertu misteriu, con dalgún individuu odiosu, como’l xefe de la Falanxe llocal que se les tien tieses col nuestru «mocín» republicanu. En fin qu’hai material pa nun aburrise. Y la verdá ye que, anque too resulta un poco «plano», la novela lleese con interés y suena a verosimil. Recomendada, pues, pa pasalo entretenío y conocer un migayín más les entreteles d’una guerra qu’asoló Europa.
«Operación Félix»
Peter Harris
Ed. Debolsillo
