Nesti casu nun voi referime a la situación política española, a la que tamién-y diría bien esti títulu, sinón al ciclu cinematográficu dirixíu por Chus Parrado. Un ciclu qu’entamó cuasi de bromes (la idega, según me cuntó, yera pa un solu añu) y que va yá pola so XIV edición.
Esti vienres invitáronme a participar nuna mesa redonda al rodiu del tema «La novela popular asturiana», asuntu por demás perdifícil yá que pienso que tal cosa nun esiste, tal y como conocemos lo que ye la novela popular, falando, claro ta, de la novela en llingua asturiana. Pero eso yera lo de menos. El casu fue que m’alcontré con un salón d’actos del Antiguu Institutu atarraquitáu de xente, al puntu que tuvieron qu’habilitar una sala nel primer pisu pa siguir les películes y el coloquiu en direutu nun sé porqué medios.
A la fin, de la mesa redonda na que tábemos anunciaos cuatro persones, namás apaecimos dos Berto Álvarez Peña y yo mesmu, y el presentador nun paecía tener muncha idega de lo que diba a tratase. Ya sabemos ¡Peor… imposible! Pero too ello encartió pa que Berto y yo tomáremos la cosa con mui bon humor y termináremos, el públicu y nosotros, riéndonos a carcaxaes. Asina que la cosa salió perfeuta, nel sen de pasalo bien falando de «la novela popular», la novela de xéneru y la lliteratura «de quioscu», cosa que siempre m’apasionó. El públicu, que yera too chavalería, sintiónos falar n’asturianu, y despidiónos con una gran ovación. Igual fue porque fuimos breves, y depués poníen «Chinos y minifaldes», la película que toos esperábemos pa siguir pasándolo bien. Norabona, Chus, y a continuar col inventu.
