Fala l’escritor Arturo Pérez-Reverte, nel so espaciu del XL Semanal, d’un de los viaxes que suel facer al país mexicanu. Tien ellí editores y llectores que, polo que se ve, trátenlu mui bien nes visites que fai pa promocionar les sos noveles, dalgunes d’elles ambientaes nel país hispanoamericanu. Préstenme dellos de los artículos y de los llibros del autor murciano, más los primeros que los últimos, pero fiédenme otros de los sos escritos nos que se pon, o faltón o sentimentaleru cuando nun tien muncho de qué falar.
L’artículu al que quiero referime (revista nº 1418) va más bien polo sentimentalero porque, llóxicamente, hai que cuidiar les ventes y nun vas metete cola mano que te da de comer. Asina, fai un percorríu señaldosu pelos llugares de la capital onde comió, tomó copes o inclusive cantó dalguna ranchera colos collacios, y pelos llugares típicos onde hai «esa frontera peligrosa que me sabe a juventud de adrenalina y bronca tequilera«. Onde van los «machos», vamos.
Ye curioso pa un intelectual, cualquier intelectual, falar de México -y más tando ellí- y nun referise al momentu críticu que ta viviendo. A les muyeres asesinaes en Ciudad Juarez, pa les que yá s’aplica la pallabra «feminicidiu», o a los 43 estudiantes esapaecíos, seguramente muertos y enterraos, na ciudá d’Iguala. O al grau de corrupción de políticos, policies y militares que tán cargándose a esi guapu país al que, per otru llau, tanto y debemos los españoles. Son coses yá sabíes, claro, y que por tanto Reverte nun tenía por qué comentar, pero yá que taba perellí bien podía dicir dalgo, xunto a los sos paseos coperos y culinarios. Pa lo que sí tuvo una opinión fue pa comentar lo bien que falen los mexicanos l’idioma español, aprovechando pa xustificar los nuevos neoloxismos de la RAE, a la qu’él pertenez. Y ye que la xóven América tien «ansia de saber y pelear» (sobre too pelear, digo yo), a la escontra de la «vieja, cobarde y caduca Europa», que «agoniza» despacio.
Quixere dicir al respeutu dos coses: la primera, que prefiero más vivir na vieya, cobarde y caduca Europa, onde se
respeten los Drechos Humanos (cada vuelta menos, tamién ye verdá) y la Llei, y un pue salir pela nueche a dar un paséu ensin que-y faigan un «secuestru-expres» o-y peguen dos tiros, que nesos otros paises, xóvenes y peleones, onde nun se da un euru pola vida humana. Yá ta bien de tópicos de vieyes europes caduques, y xóvenes y puxantes paises onde sólo viven bien los que tienen munches perres y puen pagar una seguridá privada.
Y la segunda, que ta mui bien que la RAE almita tolos neoloxismos que Reverte quiera p’averase lo más posible a la realidá llingüística, pero los que vivimos n’otru vieyu y caducu pais como ye Asturies, tamién tenemos drechu a que se recueya la nuestra realidá llingüística, y él ye un de los miembros de la Real Academia de la Lengua Española que ta torgando que los términos del so Diccionariu espeyen lo que nesti momentu ye’l nuestru idioma. Y digo idioma, y non como ellos lu siguen llamando despeutivamente: «dialecto«.
