Cúmplese esti añu’l centenariu de la publicación del llibru «Platero y yo» del Premiu Nobel Juan Ramón Jimenez. N’efeutu, fue nel añu 1914 cuando surdió la primer edición, nuna editorial que se llamaba Ed. de la Lectura, y que taba empobinada pa los escolinos. Pese a ello, JRJ siempres afirmó que’l llibru nun yera dafechamente pa neños -cosa que yo comparto- sinón pa toos, incluyíos los neños. Tan nidio lo tenía que, pa esta primera edición escolar, escribió una pequeña «antoxana» onde diz: «Suele creerse que yo escribí «Platero y yo» para los niños. No (…) Este breve libro, en donde la alegría y la pena son gemelas, cual las orejas de Platero, estaba escrito… ¡qué se yo para quién!… para quien escribimos los poetas líricos. Ahora que va a los niños, no le quito ni le pongo una coma. ¡Qué bien! (…) Yo nunca he escrito ni escribiré nada para niños porque creo que el niño puede leer los libros que lee el hombre, con determinadas excepciones que a todos se le ocurren».
Pese a ello, el llibru pasó a formar parte d’esa cosa tan abegosa que son les llistes de llibros recomendaos pa la escuela, que los rapazos tienen que lleer «por obligación», tresformando lo que debiere ser un placer, por una especie de «cárcel de papel» que namás sirve pa coye-y manía a la llectura. ¿Quiero dicir, entós, que la mocedá nun debe lleelu? Claro que non. Lo que nun se pue ye «soltalu», ensin más, como otru llibru cualquiera. Platero y yo ye un llibru poéticu y sensible, y como tal lu hai qu’averar al llector. Talo que si se tratare d’un llibru de poemes, pues la so prosa poética nun dexa de ser poesía. Y sobre too ye un llibru que se presta a ser lleíu en voz alta. Face-y la prueba y veréis qué bien suena.
Yo tengo una edición mui vieya a la que, de xemes en cuando, écho-y una güeyada, abriendo cualquier páxina al debalu. Son guapes toes. Y como pequeñu homenaxe al llibru y al so autor, pidí-y prestáu el títulu pa un llibrín míu que titulé: Deva y yo. En llugar d’un burrín, equí sal una perrina. Cuido que ye l’únicu paecíu cola maraviya de Juan Ramón. En fin, feliz centenariu a un llibrín superprestosu y que se sigan cellebrando munchos aniversarios más, pa gozu de JRJ y sobre too nuestru:
«Platero es pequeño, peludo, suave; tan blando por fuera, que se diría todo de algodón, que no lleva huesos. Sólo los espejos de sus ojos son duros cual dos escarabajos de cristal negro…
