Tuvi esti día, representando a l’Academia de la Llingua, na presentación del llibru Poética de muyeres 2014, coordináu pola siempres inquieta Helena Trexu y editáu pol Grupu Epona Ediciones. Recuerdo que tamién tuvi na primer antoloxía de muyeres que ficieron, fai agora diez años, lo qu’amuesa que’l Grupu Epona sigui dafechu na llucha. O meyor, nes lluches, la de la llingua y la de les muyeres, dos bonos oxetivos.
L’actu cellebróse n’atopadiza sala multiusos que tien la Caxa Rural de Xixón y el llocal taba cuasi enllenu. La presentación corrió a cargu del tamién «multiusos» Inaciu Galán, que desendolcó’l so llabor con aciertu y bon ritmu lo cuál nun ye fácil cuando pel escenariu pasen abondos poetes lleendo los sos testos, más l’actuación musical qu’acompangaba cada llectura. Vese qu’Inaciu domina la escena y los «tempos».
En cuantes a les escritores qu’actuaron hubo de too y too fue bono, porque hasta los pequeños fallos de principiante ficieron gracia. Hai que tener en cuenta que, como se diz n’Antoxana del llibru, participen na so confeición hasta cuatro xeneraciones de muyeres, teniendo la más mocina namás que 13 años, Laura García, y la más veterana, que ye Sabel de Fausta… nun lo dicimos por cortesía, pero en cualquier casu nun aparenta los que tien. Ente elles dos, salieron tamién al escenariu Esther García, Paz García, Naomí Suárez (que tamién fizo la música), Carmen Guardado, Alba Llaneza y Mª Xesús Llope (Chiqui), amás de la propia Helena Trexu que tamién lleó un par de poeminos curtios. Hubo coses novedoses, como’l poema de la mio amiga Paz García, un poema en construición que cambia en cada llectura dalgún versu, o la especie de poema dramatizáu de Sabel de Fausta nel qu’intervienen les voces de la Texedora y de la Filandera, na que la primera ye la muyer, la segunda’l destín, y el filu, la vida y la muerte. Sonó mui guapo. Otres poetes nun pudieron asistir al actu por diversos motivos, lo cuál facilitó les coses porque en conxunto trátase de 28 voces de muyer: un xaréu. Xunto a elles, la preciosa voz ausente d’otres dos poetes que yá nun tán con nosotros: Nené Losada y María Teresa González.
En fin, un actu mui prestosu nel que yo tamién tuvi dalguna sorpresa, pues presentóseme Inaciu Galán con dos «antigualles» míes pa que-y les firmare: la primer edición de Fontenebrosa I, una que salió en rústica allá pol añu 1984, y la de L’aire de les castañes, d’ediciones Azucel que ta cuantayá agotada. Prestóme volver a veles y firmé-yles con ciñu. Y eso fue too, y equí queda recoyío tal y como yo lo viví. Pa zarrar, un guapu poema d’Ana Vanessa Gutiérrez, conteníu nel llibru, col que pretendo representar a toles autores. Abúltame que queden bien representaes
PATRIA
Sentite falar con señaldá
de la tierra que nun tienes,
de la neñez perdida.
Yo, llonxana,
como siempre,
nun acertaba a contestar:
namás pensaba que, si le patria ye un temblor,
tu yes munches,
munches veces,
patria mía.
