«Ayer, Xueves 23, foi un día importante pa mi. Por primer vez, na mio vida como perrina, un paisano presentó un llibrín sobre mi. Llámase «Deva y yo«, y el yo al que se refier ye’l de un tal Vicente que vive conmigo nuna casa de la cai Adosinda. Llevámonos bastante bien y tolos díes lu saco a pasiar, de la qu’aprovecho pa mexar nel parque. Toos na casa me traten perbién, dende qu’Iris me rescató un día d’una pensión horrible na que dalguién (de cuyu nome nun quiero alcordame) me dexara ellí abandonada. Pero agora podría dicise que soi una perrina feliz, si ye que dalguién pue ser feliz del too nesti mundu.
El llibru del que soi la «mocina» ye guapísimu, porque los dibuxos que me representen fízolos una moza que se llama «Begmont» que ye una artista. Nun me sacó tan guapa como soi, porque eso ye difícil, pero doi bastante bien nel dibuxu. Y lo mesmo los mios mozos: Queco y Nel. Diríavos que lu mercarais, porque de xuro que diba a prestavos, pero nun quiero paecer «pesetera» o interesada. Como amuesa de
lo que vos digo, póngovos un par de semeyes y un enllaz pa aquellos, más pexigueres, que quieran ver en vidiu cómo fue lo de la presentación. Y yá nun se m’ocurre qué más dicivos. Asina que, ¡hasta otra!
Un besín de Deva»
L’enllaz:
http://www.pintar-pintar.com/index.php?pag=modulo&IdModulo=71&IdElemento=80
