Dalguna vegada falé d’un tipu de lliteratura que me fadia muncho y que llamé, por clasificala de dalgún mou, «lliteratura de muyeres». Pal que me conoza sabe que nun hai nengún afán nello de meteme coles mios conxéneres, que nel tema de la llectura (y en gran midida tamién na escritura) dannos a los paisanos cien vueltes. Refiérome cola espresión a esi tipu de lliteratura qu’agora encabecen títulos como «El tiempo entre costuras» y otros mui perconocíos, que tán nel maxín de toos. Nun digo que seyan bonos o malos, digo namás qu’a min nun me gusten.
Por contra, hai cantidá de muyeres, y más últimamente, de les que me presta abondo lo qu’escriben y cómo lo escriben. Equí, nesti mesmu espaciu, tengo a munches referenciaes y non a toes porque nun puedo comentar tolo que lleo. Asina, nomes como Chimamanda Adichie Ngozie, Irene Nemirovsky o Elena Ferrante, por poner namás dalgunos exemplos de notables escritores.
Pongo tou esti rollu introductoriu pa dicir que, acabo terminar otra novela escrita por una muyer, que me prestó muncho. Ye una escritora de nome Sofi Oksanen, finlandesa, de padre tamién finlandés y madre d’Estonia. Y d’esti país trata precisamente la novela. Un país, Estonia, que conoció invasiones por parte de l’Alemania nazi y de la Unión Soviética estalinista. «Purga» ye una historia dura, qu’axunta elementos de novela política, de novela negra y de novela d’amor, nun entornu estrañu, d’un pueblu pequeñu arrodiáu per viesques y nel que toos son sospechosos de dalgo, porque unos collaboraron colos nazis y otros colos soviéticos, mentanto otros pocos lluchaben pola so independencia. El personaxe principal ye Aliide Truu, que principia siendo una anciana que recueye a una mocina maltratada, y a traves de la cuál cuéntase la historia, una historia terrible. Nun se sabe si almirar más la entereza d’Aliide, o la so capacidá pa conspirar en tou tiempu y llugar. La historia ta cuntada como en «flashbacks», baraxando distintes époques y espacios. Mieu, humillación, vengances, amores, delaciones… munchos sentimientos percorren les páxines de «Purga», cuntaes con una cenciellez demoledora, desprovista de grandes retóriques. Paga la pena lleer esta novela que, entá depués de finada, tovía te dexa un posu d’esmolición nel alma. Y ye que la llucha pola propia supervivencia humana nun tien llendes. El ser humanu reinvéntase pa siguir viviendo. Mui recomendable.
«Purga»
Sofi Oksanen
Salamandra
2011
