close
“… qué oreyes más llargues tienes…”

“… qué oreyes más llargues tienes…”

Capiellín coloráu“Capiellín coloráu” ye un de los cuentos clásicos que recueye’l mieu al llobu, a esi animal que, como se dixo ayer na presentación de “El llobu na tradición oral asturiana“, provoca “almiración y pánicu”. Hai munchos otros exemplos. Esti llibru, editáu pela Academia de la Llingua Asturiana, na so coleición “Testos de recoyida oral”, ye un trabayu d’una de les persones que más almiro dientro de la intelectualidá asturiana: Berto Álvarez Peña. Amás tengo la suerte de que, como ye amigu míu, pudi diciilo más d’una vez. Berto atropa pa sí una riestra de cualidaes que lu faen únicu: la primera la cenciellez. Otru cualquiera colos sos conocimientos andaría perehí, tou enchipáu, poniendo “pose” d’artista. Anque dacuando lu riño porque a dalgunos sitios hai que dir “curiosu”, la verdá ye que la so imaxe ye única. Va igual a falar con un aldeanu de Balmonte que al Palaciu la Zarzuela. Y ye que, detrás d’esi aspeutu desaliñáu y un poco “xostrón”, ta esi intelectual trabayador, rigurosu, amenu, intelixente… Pues sentir falar a Berto dos veces siguíes, sobre’l mesmu tema, y dicite coses completamente nueves d’una a otra vez, tal ye’l caudal de los sos conocimientos. Pero, amás, como los grandes investigadores sociales, nun se queda nun meru analís de los nuestros rasgos culturales, esi patrimoniu inmaterial de cuentos, lleendes, tradiciones, etc. sinón que los rellaciona con otres cultures, con otros paises, con otres dómines temporales. Lleer o sentir a Berto ye introducite na Gran Cultura Universal de tolos tiempos. Un luxu.

Na presentación nel Club de La Nueva España de Xixón, que tan bien dirixe l’amigu Luismi Piñera, tuvo BertoEl llobu acompañáu d’otra persona a la qu’almiro muncho: Roberto González-Quevedo. “Rober”, compañeru d’Academia (el ye’l Secretariu) ye la otra vertiente del intelectual. Si Berto destaca, penriba de too, pol so trabayu de campu, pola recoyida oral de datos, pola entruga personal y direuta, Roberto muévese meyor nel trabayu teóricu, nos estudios “de despachu”, nes estadístiques, estrapolaciones, conclusiones… too eso que supón remanar abondos datos, ordenalos, clasificalos, aventurar hipótesis. Son, pues, dos trabayos complementarios ya imprescindibles. Otru luxu.

¡Qué desgracia de País el nuestru, incapaz de poner en valir a xente tan capaz como estos dos exemplos qu’ayeri tuvimos delantre! Un País nel que les medianíes ocupen los llugares más importantes, mentanto les verdaderes ayalgues que tenemos en música (perellí andaba, Dani de la Cuesta), en lliteratura, en socioloxía, n’historia, en teatru… viven tapecíos y sobreviven con dificultaes. País de mierda…

Pero, bono, na marxinalidá tamién se sobrevive. El llocal taba enllenu y apináu de cares conocíes: Marta Mori, Pablo Xuan Manzano, Paco Abril, xente d’El Garapiellu, Neto, Dani de la Cuesta, María Xosé de la Oficina de la Llingua… en fin, nun se trata de citalos a toos. En cuantes al conteníu de la presentación… Como castigu a los que nun fuisteis nun voi dicivos nada, a ver dío. Amás, recordái lo que vos dixi enantes: n’otra presentación d’esti mesmu llibru, Berto diría coses dafechamente distintes. Lo recomendable ye mercar el llibru y lleelu. Paga la pena.
(Semeya del actu LNE)