Tenía 17 años Susan E. Hinton cuando escribió esta novela y agora, relleéndola, un ye capaz de valorar la capacidá narrativa d’esta mocina y el perfeutu conocimientu qu’amuesa del mundu de la mocedá. Novela xuvenil, pero d’eses que nun suelen recomendase pa los rapazos de los nuestros institutos, nin avecen a figurar nes llistes qu’ufierten los críticos lliterarios nos diarios de gran tirada. Un día comentaré los dieciseis llibros infantiles y xuveniles que recomendaba l’otru día «El País»: pa nun volver a garrar un llibru. Equí, claro, hai violencia, y alcohol, y families rotes, polo que llegaron a prohibila en delles escueles de la época (1967) lo cuál, a la vista lo que tamos viendo agora, nun tuvo nengún sentíu.
«Rebeldes» ye tolo contrario d’eses noveles políticamente correutes. Una novela que se llee d’un tirón porque lo que te cuenten suénate a real, a verdadero, o polo menos a verosimil. Susan Hinton tenía la edá de dalgunos de los sos protagonistes cuando la escribió, quiciás por ello nada paez impostao, cuntao dende fuera. A la escontra, da la impresión de que l’autora ta falándonos de los sos amigos… y enemigos. Porque la historia que nos narra ye la del enfrentamientu de dos bandes nuna ciudá norteamericana. Unos, los «greasers», de baxa estraición social, pero non lumpen, sinón fíos d’obreros industriales, dalgún d’ellos tamién trabayando (Steve y Soda fáenlo nuna gasolinera, Darry nuna fábrica). Los otros son los «socs», fíos de xente de «pasta», qu’anden en bonos coches y visten a la moda. Dambes pandilles se les tienen xuraes y tán siempre buscando pelea. Y, claro, alcuéntrenla. Hai pues llucha de bandes, pero tamién de clases sociales, anque l’autora pon l’acentu fundamentalmente nos más probes.
Pero’l personaxe principal de la novela, alredor del cuál xira tol argumentu ye Ponyboy, un rapaz de catorce años que vive colos dos hermanos mayores Darry de 20 y Soda de 17, que tienen que buscase la vida porque sos padres morrieron nun accidente un par d’años enantes. Ponyboy cuéntanos en primer persona la so vida, la de los hermanos y la de la pandilla a la que pertenez como miembru más mozu. Y a traviés de lo que cuenta, el llector pescancia lo perdíu que ta, la dificultá que tien pa incorporase dafechu al mundu adultu. Una de les coses que más me prestaron de la novela ye que los personaxes nun son estereotipos, como suel pasar nesta clas de noveles. Nun representen modelos, sinon que son seres vivos, con sentimientos, con contradiciones y sobre too con duldes, munches duldes. Ponyboy va al institutu y ye un bon estudiante y los hermanos anímenlu a que siga per esi camín, que nun siga’l d’ellos condenaos a vivir nun mundu zarráu y ensin salida. Y el chaval llucha ente facer casu a los hermanos, o la fidelidá a los sos amigos, compañeros de banda, cuasi otros hermanos anque seyan tan distintos d’él. Una muerte va a esclaria-y el camín que tien de tomar con un final mui afayadizu.
La novela dio llugar a una película de Francis Ford Coppola que tuvo munchu ésitu, anque yo nun la vi. Pero paga la pena recomendar la so llectura pa rapazos (y tamién p’adultos) cola seguridá de que va a presta-yos y va a emburrialos a nueves llectures que, en definitiva, ye de lo que se trata.
