close
Reines y otres muyeres en La Monarquía Asturiana

Reines y otres muyeres en La Monarquía Asturiana

Presentóse esti día nel Club de La Nueva España, n’Uviéu, el llibru “Las Reinas de la Monarquía Asturiana y su tiempo (718-925)”, del historiador de la Universidá d’Uviéu Álvaro Solano. La presentación corrió a cargu, amás del propiu escritor, del profesor de la Universidá de South Florida, n’Estaos Xuníos, David Arbesú y de la investigadora Carla Rubiera, que pertenez al grupu “Deméter” de la Universidá uvieina, qu’estudia los asuntos de xéneru dende la dómina antigua hasta los nuesos díes.

Nun puedo dar una opinión personal del conteníu del llibru, porque lu merqué ellí mesmo na presentación y ye un volume de cuatrocientes páxines, pero polo dicho nel actu, tien una mui bona pinta. Como pongo nel mio títulu, nun son sólo reines les qu’apaecen peles páxines del estensu volume, sinón tamién otres muyeres, reales o de lleenda, que tuvieron un espaciu a lo llargo de los años del Reinu Asturianu. Que por cierto, el profesor Solano allarga hasta’l 925, en llugar del tradicional del 910, al siguir teniendo continuidá’l reinu en manes del fiu pequeñu d’Alfonso III, Fruela, que caltenía’l títulu de “Rex”, anque’l reinu se treslladare a Lleón a manes, socesivamente, de los sos hermanos.

El llibru dixébrase en dos grandes apartaos: ENTRE LA REALIDAD DE LAS FUENTES, onde apaecen les muyeres de les que se tien constancia fiable de la so esistencia: Ermesinda, Adosinda, Ximena, Munia, Paterna, la musulmana Urraca banu Qasi, Froiliuba… y una segunda parte titulada: …Y LAS SOMBRAS DE LA LEYENDA, onde figuren otres muyeres más bien frutu de lleendes posteriores, anque yá mui antigües, como Gaudiosa, la muyer de Pelayo, Sisalda, el tributu de les Cien Doncelles, etc.

L’autor remana una gran cantidá de documentación -dientro de lo escoso de les fontes de la época- y ellí onde les fontes nun lleguen, emplega otros argumentos estremando, en tou casu, el conocimientu real, de les hipótesis o suposiciones, munches veces emplegaes por motivos políticos, más o menos confesables.

En resume, un llibru que resulta ser mui interesante, y que vien a afondar nun tema -el de xéneru- mui poco estudiáu (anque Juan Ignacio Ruiz de la Peña, yá s’ocupare del mésmu) dientro de la muncha lliteratura que dio, y sigui dando, esa dómina de la qu’esti añu cellebramos los 1300 años: El Reinu d’Asturies.
(Semeya: Luisma Murias)