Títulu: Sombras sobre Berlín
Autor: Volker Kutscher
Torna: Susana Andrés Font
Editorial: Ediciones B
Añu: 2007
DEMASIAES SOLOMBRES.- Volker Kutscher ye un escritor alemán, nacíu en Lindlar nel añu 1962. D»amplia formación intelectual (ye llingüista, historiador, filósofu y periodista) dedicóse a la novela creando, nel añu 2007, el so protagonista, l’inspector Gereon Rath, que yá va pol tercer títulu: ésta, Sombras sobre Berlín, Muerte en Berlín (2009) y Un gangster en Berlín (2010). Como historiador Volker ta especializáu na Alemania de los años d»enteguerres, los venti y los trenta, poro nun ye d»estrañar que l’aición d»esta primer novela suya trescurra nel añu 1929. Época convulsa na que conviven una serie de fuerces emerxentes que se disputen el predominiu que llueu van llevar, como sabemos, los nazis.
El Berlín que retrata l»autor alemán ye mui ricu y enllenu contrastes. Ta la ciudá llaboriosa que se recupera de la guerra, la de la nueche, colos cabarets y antros onde too pue consiguise, la miserable de la delincuencia y los crímenes, y la política, onde lluchen, físicamente, comunistes y nazis cola policía pa facese col control de les cais. Nesta ciudá-mosáicu, la novela cuenta la llucha de munchos y variaos elementos por apoderase d»una gran remesa d»oru llegáu de Rusia, procedente d’un noble que la introduxo de contrabandu. Por ella peléense, varios grupos mafiosos; los comunistes, que quieren comprar armes; la policía, y grupos militaristes, al rodiu de los nazis, que preparen una revolución socio-política.
Metanes de too ello, l’Inspector de la Policía Criminal Gereon Rath, llegáu de Colonia, onde tuvo un altercáu que lu obligó a marchar a toa priesa, anda dando palos de ciegu y xuntándose con xente de toa triba pa tratar d’alcontrar dalgo de lluz nun casu que paez bien tapecíu. L’autor ta, al mio xuiciu, condicionáu por querer abarcar demasiaos intereses contrapuestos y eso fai que’l rellatu peque d»un ciertu «desbaraxuste» y resulte, dacuando, confusu. Y, seguramente polos sos amplios conocimientos sobre’l tema, pretende baxar a tantu detalle que la llectura resiéntese. Por poner un exemplu, cuando fala de la policía paez danos un cursu de cómo s’estructuraben los distintos cuerpos de la mésma: la Policía Criminal, la Política, la de Costumes… con una riestra de mandos y submandos que fai complexo l’enterase de too y, amás, ye innecesario pal desendolcu de la historia. En cambiu ye mui bona l’ambientación, el trazu de la ciudá, anque fadría falta un planu pa orientase na montonera de cais que nos va citando, destacando sobremanera determinaes descripciones, como la de la manifestación comunista del 1º de Mayu, colos cartelos de les tres «eles» (Lenin, Liebnecht y Luxemburg) y les pelées cola policia que tien les cais tomaes. El personaxe del Inspector Rath ta bien dibuxáu y abúltame que pue dar bon xuegu neses prósimes entregues, yá publicaes nel nuestru país. Sicasí esperar que l’autor nun se meta nelles en tantos enguedeyos.
