Igual te suena’l nome, porque anda siempre metida en doscientos enguedeyos. Por si nun te suena voi falate d’ella. Teresa ye una monxa benedictina del Monasteriu de San Benet de Montserrat un migayín… orixinal, porque nos últimos años tiense convertío nuna de les figures más importantes de la resistencia antisistema o de los «indignaos» (los calificativos póngo-ylos yo y seguro que nun-y prestaríen muncho, pero ye pa entendenos) La monxa Forcades (como pa llamala «madre»…) ye doctora en salú pública pola Universitat de Barcelona, doctora en teoloxía fundamental pola Facultá de Teoloxía de Cataluña y especialista en medicina interna pola State University of New York. Anguaño ye profesora de teoloxía na Universidá de Humboldt, n’Alemania.
Esta polifacética muyer saltó a «los medios» a traviés d’una durísima campaña qu’entamó escontra les empreses farmacéutiques. La so opinión dexóla, amás d’en numberoses conferencies y coloquios, nun llibru cuyu títulu yá lo diz too: «Los crímenes de las grandes compañías farmacéuticas» (ed. Cristianisme i Justicia, 2006), amás de les sos intervenciones crítiques escontra la vacunación masiva de la gripe A. Tengo nesti momentu dos llibros d’ella nel mio poder, un de los cualos acabo terminalu y l’otru voi camín d’ello. El termináu, abúltame que yá lu mencioné equí en dalguna ocasión, titúlase: «La teología feminista en la Historia». Un interesantísimu percorríu d’aquelles muyeres que, dientro’l senu de la Ilesia, quixeron alzar la voz pa defender el so llugar pareyu en dignidá, llibertá ya intelectualidá col de los paisanos. Una corriente crítica, mui minoritaria, pero que nun dexó de tener a importantes validores. Asina, depués de desplicanos lo qu’ella entiende por una «teoloxía feminista» (a la escontra de la «oficial» teoloxía patriarcal), fai un repás per sieglos, d’un piñu de muyeres que, arrecostinando con dificultaes, incomprensiones y represalies, rebatieron, sofitándose nos propios escritos cristianos, les munches mentires que se
dixeron pa separtar a la muyer de la xera institucional de la Ilesia. Asina surden los nomes de Christine de Pizan, Isabel de Villena, Santa Teresa de Xesús (a la que-y censuraron parte de la so obra y fue persiguida y encarcelada poles sos idegues), María d’Ágreda, Sor Juana Inés de la Cruz (intelectual y tresgresora, a la que prohibieron siguir escribiendo), María de Zayas, Marie de Gournay, Anna María Van Schurman y otres cuantes muyeres que Teresa Forcades descúbrenos nel so camín pela Historia. De toes elles da cuenta de la so vida y obra, con afayaízos comentarios perbién documentaos, nuna llectura que se fai superentretenida, inclusive p’aquellos que, como yo, somos más bien agnósticos.
L’otru llibru de la Forcades lleva por títulu «Sin miedo«, y trátase d’una conversación «a dos» d’ella mesma y d’otra activista social y política, como ye Esther Vivas, periodista y socióloga, autora de dellos llibros como «Planeta indignado. Ocupando el futuro». Pero d’ésti otru llibru escribiré otru día, pa nun cafiar demasiao. En cualquier casu, y polo que llevo lleído, nun tien desperdiciu. ¡Vaya, vaya, cola «madre» Forcades!
