La editorial Pearson/Alhambra, cola que tengo tres noveles xuveniles editaes en castellán(El barco de los locos; Las aventuras de Inés Saldaña; y El cielo de los dinosaurios) elimina dafechu la so división de lliteratura quedándose, namás, colos llibros de textu y los diccionarios. D’esi mou desfáense de toles esistencies que tienen avisándonos a los autores pa que dispongamos d’elles, quedando como opción última la d’unvialos a reciclase como papel.
La verdá ye que me da pena qu’unes obres (y nun lo digo sólo poles míes) que costaron tiempu y esfuerzu escribiles, y perres l’editales y distribuíles, vayan agora a destruyise, anque tamién ye verdá que munches veces gástase’l papel en coses que nun lo merecen. Quiero creyer que nun ye’l mio casu. En cuantes a les mios noveles abúltame que cumplieron el so cometíu: conocieron varies ediciones, inclusive publicáronse en paises de latinoamérica (Colombia, Perú, Chile, Arxentina…), una d’elles (Las aventuras…) ganó’l prestixosu premiu de la CCEI a la novela xuvenil que meyor defendió los derechos humanos nel añu 2007, y otra (El barco…) tuvo na «Lista de Honor» del mesmu premiu nel 2004. El so percorríu, por tanto, dó-ylu por xustificáu.
En cualquier casu, y como m’atristayaba la muerte na guillotina d’esos fíos lliterarios, enteréme qu’hai una organización ensin ánimu de lucru que se fai cargo d’ellos con destín a la República Dominicana. Esa organización llámase Asociación Cultural «Lleva un Libro en la Maleta» y, n’efeutu, recueye llibros pa llevalos a miles de neños nel so país que, d’otru mou, nun tendríen el qué lleer. Ellí hai biblioteques, colexos y clubes de llectura que reciben colos brazos abiertos estes donaciones culturales d’esti llau del mar. L’asociación tien sede en Madrid y n’Uviéu y cuenta con un piñu de muyeres incansables nel so interés y el so bon facer en porgüeyu d’esos neños y neñes dominicanos. Rosana Puello, María Rosa Serdio, Carmen Pevida, Celia López y la propia Virginia Read Escobal, la presidenta, solucionaron tolos problemes de «loxística» pal unvíu d’esos cientos de llibros dende la editorial a los sos almacenes y, d’ellí
hasta’l so país.
La idea de l’asociación ta recoyía nun llibru editáu por Pintar-Pintar, tituláu precisamente Lleva un libro en la maleta, escritu por Virginia Read Escobal impulsora, como digo, d’esta perguapa iniciativa. Por si vos presta, podéis echar una güeyada al enllaz: http://www.pintar-pintar.com/p801765-lleva-un-libro-en-la-maleta.html
La verdá ye que nun podía esperar por un fin meyor pa los llibros qu’un día escribí, ensin saber que, munchu tiempu depués y a munchos kilómetros d’onde ñací y vivo, unos neños ilusionaos diben a volver a da-yos vida a unos personaxes condenaos a la esapaición. Asina que les gracies que siempre me da Rosana, en realidá tengo que dá-yles yo a ella. Y si non, mirar dalgo de lo que tán faciendo perallá alantre. ¿Nun ye mui guapo?:
https://www.facebook.com/Asociaci%C3%B3n-Cultural-Lleva-un-Libro-en-la-Maleta-184856298248971/
