Gracies a Dios, o a la so correspondiente figura llaica, entovía queden n’España dalgunes editoriales que publiquen pol placer de facer les coses bien. Unes pequeñes empreses, cuasi siempre al rodiu d’una persona, una familia o unos bonos amigos, qu’aborrecen de tanta novela vanal, de tantu papel esperdiciáu y de tantu boom d’ésitu y tornen los sos güeyos a otru tipu de llibros. Quiero creyer que con ello cubrirán gastos y que la xera-yos dea pa comer, porque sinón habrá que se despidir tamién d’ellos.
Una d’eses editoriales exemplares ye José J. de Olañeta, Editor. Y tengo nes mios manes una pequeña ayalga de la so cuidada editorial. Trátase de «Diálogos con la luna», del autor danés Hans Christian Andersen. Andersen, famosu polos sos cuentos, unos rellacionaos colos populares y otros de collecha propia tien, amás, una estensa obra na que s’incluyen teatru, novela y autobiografía, anque polo que pasó a esi llugar que llamen «la inmortalidá», fuere polos sos perguapos cuentos.
Al bonu de Hans Christian disputábenselu nes reuniones sociales y familiares pola so gran fama de «tusitala», de cuntador de cuentos. Y él prestábase a ello encantáu porque naguaba por xubir d’escala social y eso axudábalu a facelo. Pero Hans, mientres cuntaba los sos cuentos, unos yá famosos y otros qu’inventaba sobre la marcha, entreteníase, y entretenía al «respetable», recortando unes curioses figures de papel que al final enseñaba, y que resultaben ser una especie de complementu de la historia. Y ye que’l famosu danés yera tamién un notable artista plásticu. Cientos d’eses figures de papel llegaron, cosa estraña por ser material tan efímeru, hasta’l nuestru tiempu y dalgunes d’elles amuésense nesti llibrín.
«Diálogos con la luna» ye la historia de lo que’l nuestru románticu satélite (hasta que lu pisaron los americanos) cúnta-y a un xoven artista solitariu. La lluna, a lo llargo de trenta y dos nueches, va desplicándo-y al pintor, con un llinguax poéticu, lo que va viendo nel so percorríu pel mundu: actividaes, sentimientos… col envís de sirvi-y d’inspiración pa posibles cuadros suyos. El resultáu ye un frescu perguapu d’usos y costumes. El llibru lleva por sotítulu «Libro de imágenes sin imágenes», que yera’l so nome orixinal. Una ayalguina.
