El caberu llibru qu’asoleya la editorial Pintar-Pintar lleva por títulu «Prau» y vien firmáu por Daniel García Granda y Ester Sánchez. Trátase d’un testu mui senciellu, enllenu tenrura y mui prestosu pa primeros llectores. L’autor xuega coles pallabres, coles frases, como si fueren parte d’una cosadiella o d’un rompecabeces armable (y amable) nel que pudiere camudar l’orde de les mésmes y siguiere teniendo la mesma musicalidá, la mesa dulzura. Caben tamién el sentíu del humor, les repeticiones inxenioses, les metáfores afortunaes. Xunto a estos testos mínimos enllenos de detalles, rescamplen les ilustraciones d’Ester Sánchez que por sí soles valdríen pa completar un maraviosu album cromáticu. Ester ye a reproducir colos sos pinceles (ye una metáfora, nun sé cómo trabaya) esos verdes asturianos qu’almiramos en Valle o en Piñole, pero dándo-yos una entidá propia, un plizcu «de la casa». Al tiempu, les figures, dacuando etérees, dacuando imaxinaes, percorren dalgunes páxines del llibru de mou un poco pantasmal, güeyándose como a retazos, tímidamente, como si nun quixeren apaecer del too. A valorar tamién un diseñu y una maquetación mui afayadizos que completen la obra lliteraria. El resultáu ye un cuentu guapísimu y, atrévome a dicir, con un tastu mui asturianu, que lu diferenciaría de cualisquier otru que tuviere les mesmes intenciones. Seríamos a estremalu ente un balagar de llibros infantiles escoyéndolu por esi sabor a dalgo «nuestro». Felicitaciones, pues, a dambos autores por esta pequeña ayalga qu’enancha esi yá importantea catálogu que va algamando, pasu ente pasu, la editorial Pintar-Pintar.
Un maraviosu Prau
