Siempres ye emocionante recordar a aquel gran rapaz que fue Andresín Solar. Conocilu dende los sos anicios, lleváu a Conceyu Bable por Carlos Rubiera y por Ramón d’Andrés, y yera un mozu tímidu pero espabiláu que bien ceo s’adautó a les nuestres xeres porque, a la fin, yeren tamién les suyes. Tengo pasaes con elli unes cuantes anéudotes que n’otros sitios cunté, y fue mui prestoso cuando m’encargaron facer la edición de les sos obres nun publicaes, nel añu 2004, en que-y dedicaron, por parte la Oficina Política Llingüística, la XXV Selmana de les Lletres.
Poro ye un placer pa min acudir añalmente a la entrega premios nel so honor, qu’entama tolos años la incombustible (por munchu tiempu) Xunta pola Defensa de la Llingua que merecería dalgún añu premiase así mesma. Esti añu cumplíase el XXX, anque en realidá nun se cumpliría hasta’l día los Inocentes. L’actu, conducíu como siempre pol dúu Varillas-Ana Vanessa de forma impecable, entregó esta vuelta la so másima distinción al grupu «Reciella. Families pol Asturianu», que dirixen almirablemente David Guardado ya Iris Díaz Trancho, xunto con otros pás y mas y, por supuesto, colos neños. Unos neños que fueron los protagonistes del actu, xubiendo a falar al «micro» -Catuxa tuvo xenial- y desplegando una pancartina que dio un poco guerra pa formala, ente les sonrises de los asistentes. Llueu les pallabres de David, como siempre comedíes y acertaes, y el discursu d’actividaes de la Xunta que lleó l’amigu Pulgar y que tuvo, al mio xuiciu, mui bien.
Pa zarrar l’actu, trayeron al veteranu cantante Xulio Ramos, superviviente d’aquellos primeros cantautores
asturianos, y al que siempre-y tuvi gran apreciu pola so fidelidá a lo llargo toos estos años. Cantó dellos poemes d’Andrés, musicaos por él mesmu, menos la torna d’un poema de Neruda al que-y tien puesta música Paco Ibáñez. Tuvo bien. Sicasí, y por poner dalguna «pega», dicir qu’igual los neños, a los que se-yos entregaba esti día’l Pegoyu, mereceríen un fin de fiesta más acordies cola so edá, tanto si fuere musical o de cualisquier otra actividá «lúdica». Abúltame que s’aburrieron un poco. Pero, en fin, eso nun tapez pa nada la importancia del actu nel que, como siempres, echóse de menos a muncha xente a la que se-y enllena la boca d’asturianía… nes redes sociales. Pero eso yá repuna un poco el dicilo. Norabona, pues, a los merecidísimos premiaos de Reciella (del madreñazu niégome a falar, nun quiero da-yos publicidá), y norabona, tamién, a la «Xuntapola» pol so compromisu cola llingua. Y pa Lali y Jesús, a los qu’abrazamos col cariñu de tolos años, un besu mui, mui fuerte. Ellos son l’alma de too esto.
