L’Atenéu Obreru de Xixón ye una reputada institución, nun sólo en Xixón y n’Asturies, sinón nel contestu de tol estáu Español. De fechu, ésti fue un de los primeros ateneos que se fundaron pues remóntase, na menos, que a 1881.El llabor de toa frasca que desendolcó queda espeyáu en múltiples publicaciones, nun sólo propies, sinón tamién ayenes siendo un verdaderu referente pa tolos que fueron fundándose depués. La so actividá quedó interrumpida cola llegada del franquismu que lu trancó dafechu ya incautó los sos bienes, siendo munchos socios y direutivos represaliaos. Fue yá nel añu 1981, cien años depués de la so fundación, cuando un grupu d’antiguos socios y otra xente interesao, cola axuda del ayuntamientu socialista de la dómina, promovió una «refundación», pasando nel añu 1985 a ocupar los actuales llocales de la cai Covadonga, nun pisu que yera propiedá del famosu mélicu xixonés, don Severino Lagunilla Trancho, que dio toles facilidaes pa la so adquisición.
Dende esa época, les socesives direutives del Atenéu Obreru festexen la efemérides, al rodiu del mes de Ochobre, con un llamáu «Día del Sociu», nel qu’entamen diversos actos finalizando con un pinchéu nel propiu llocal social. Como antiguos socios, vamos tolos años a esa cellebración qu’encartia, amás, como llugar d’alcuentru de vieyos amigos.
Esti añu les actividaes programaes por Luis Pascual y la so xunta direutiva fueron dos: per un llau la presentación del llibru de Pilar Sánchez Vicente, «Luciérnagas en la memoria«, y per otru l’actuación musical del cantautor Rodrigo Alperi. Conozo a Pilar dende va una «estrapallada» d’años. Dende que, xunto al so hermanu y otros collacios trabayábemos en Conceyu Bable-Xixón. Ella, que d’aquella yera una neña de 15 años, cuidábanos a los fíos pequeños mientres preparábemos dalguna actividá o reunión. Los neños quedaben encantaos pues tenía mui bona mano. Llueu perdímonos la pista, hasta que la recuperamos va un tiempu, de magar ella principió a publicar les sos interesantes noveles. Nun lleí entovía la última novela de Pilar, pero pola so presentación yá tengo gana de facelo. Estuvo interesantísima, partiendo d’un pequeñu vidíu colos antecedentes de los personaxes protagonistes y siguiendo pol desarrollu d’una parte de l’aición (lo que podía cuntase) y, sobre too, de cómo fue la preparación d’una historia que-y llevó tres años hasta dala a la lluz. Pilar tuvo mui bien como «comunicadora»: presentó’l llibru, echó un mitín, y aleccionó sobre unos fechos y unes persones que xugaron siempres el papel de perdedores. Ganóse, merecidamente, la ovación del públicu.
La gran sorpresa de la nueche fue, ensin embargu, Rodrigo Alperi. O más matizao: Rodrigo Alperi Trancho, pues resultó que yera familia de la
mio muyer anque nun lu vía dende neñu. Neñu sigue siendo, porque tien namás 19 años recién fechos, pero que naide se dexe engañar por ello: tien una voz fonda, guapísima y una seguridá no que fae que nun la tienen munchos veteranos. El recital que dio fue, cuasi esclusivamente dedicáu a les canciones de Paco Ibañez, un cantante al que siempres almiré, dende’l primer conciertu al que fui, nel Madrid franquista de 1968, mientres facía ellí la «mili». Rodrigo, que convivió col valencianu un tiempu, ye dignu sucesor suyu y faite recordar la so voz como si fueren almes ximielgues. Meyor dicho, Rodrigo canta meyor que Paco anque, claro, a min emocióname más sentir esa voz dalgo «desgarrada» del valencianu, una voz que tresmite direutamente al corazón. Nun faltaron les canciones clásiques de poetes como Miguel Hernández, Blas de Otero, Gabriel Celaya y la maraviosa «Palabras para Julia», de José Agustín Goytisolo. Al finalizar, un poco col cuerpu respigáu, tuvi falando con él y comenté-y lo mal que se portaron los antiguos «progres», tanto col propiu Paco Ibañez -que tuvo tiempu ensin poder trabayar- como con dellos de los poetes qu’escribieron escontra’l franquismu (l’hospital onde tuvo Celaya en 1990 tuvo que lu pagar el Ministeriu de Cultura porque taba na miseria), mas la roxura de dalgunos «abertxales» que los marxinaron tildándolos d’ «españolistes».
En fin, una xornada feliz que completamos con unos modestos, anque sabrosos, «pinchinos» (la cosa nun da pa más) y les prestoses conversaciones del post-actu, con un piñu d’amigos y collacios. Y agora a esperar el día del sociu del añu que vien que, como se cumplen 30 años, de xuro qu’habrá que festexar «a lo grande»: intelectualmente falando, claro.
