El Premiu Edebé de lliteratura xuvenil ye, seguramente, el más importante d’España en rellación cola so dotación: na menos que 30.000 euros de bellón lleva’l ganador. Eso nun garantiza la calidá de les obres ganadores, como bien sabemos pol Premiu Planeta que da munches perres y hai de too, pero deberíemos suponer que nésti, nel Edebé, nun hai tantes «presiones» (por llamalo de dalgún mou suave) como nel de la familia Lara, que «suelta» 600.000 eurazos pal ganador/a y más de 150.000 pal segundu agraciáu/a y que tien fama d’emplegar muncho’l deu.
Sea como fuere, el casu ye que merqué la novela ganadora del Edebé, que se titula «Desconocidos» y ta escrita por David Lozano, envizcáu un poco pola fama del premiu y otro poco pola reseñina que-y ponía la prensa especializada (Clij). Dos persones que se conocen por Internet y que llueu deciden facelo personalmente. Una moza y, supuestamente, un mozu. Ya sabemos. Y, al tiempu, un suicidiu que depués resulta nun selo. La trama podía dar xuegu, pero la novela ye una cosa aburridísima que, hasta les últimes 15 páxines namás que fai que falar y falar en dos escenarios únicos, como una cámara fixa que se llantara nun café y otra nun descampáu. Con unos diálogos ensin chispa y munchos llugares comunes, tanto na rellación de los mozos interneteros como nos protagonizaos por una policía y un forense. El final taba cantáu dende muncho enantes, y los rasgos de modernidá son que l’alcuentru produzse a traviés d’internet y los rapazos dicen, de xemes en cuando, eso de «mola» o «guay». Tamién dalgo de «moralina» avisando de que nes Redes, nun ye oru tolo que relluma.
En fin, la verdá ye qu’esperaba abondo más del premiu y de la novela. Dizme la mio sobrina Sara, que llee muncha lliteratura xuvenil, que l’autor tien una triloxía gótica, de munchu mieu, que ta bastante bien. Nun sé si m’atreveré con ella, igual ye que yo tovía nun llegué al góticu y quedé llantáu nel románicu.
