¿Pero los vampiros nun yeren inmortales? Paez ser que non, porque acaba morrer el más grande de toos, na menos que’l Conde Drácula, tamién conocíu como Sir Christopher Lee. El Sir nun-y lu pongo yo, púnxolu la Reina d’Inglaterra, d’ehí qu’aproveche’l títulu d’un simpatíquisimu cuentu de María Teresa González, nesti aniversariu del so fallecimientu, y que ta recoyíu na so Obra completa: Don Álvaro, Marqués de les Lloses y Conde d’El Arenal. Esti otru, Christopher/Drácula, apavorió la mio mocedá faciéndome tremar y, al tiempu, gociar con aquel maraviosu Drácula de la Hammer, embaxo la direición de Terence Fisher y teniendo como compañeru a otru grande: Peter Cushing. El personaxe tuvo munches cares y munchos direutores trataron el tema, pero naide como Fisher y esos dos actores llograron conmovenos y metenos el mieu nel cuerpu. Anque’l propiu Lee siguió interpretando al personaxe del inmortal vampiru, tal y como fuere configuráu por Bram Stoker, nunca más lo fizo tan bien como con Fisher ya inclusive hubo cintes nes que se parodió a sí mesmu.
Lo que más se recuerda d’él fueron los trabayos de «malu», pero tamién interpretó dalgunos de «mocín», ente ellos a otru inmortal: Sherlock Holmes. A última hora de la so carrera, cuando yá taba un poco mayucu, llamáronlu pa facer otros personaxes como n’El Señor de los anillos, o La guerra de las Galaxias. Nun lu vi. Y cuasi prefiero nun tenelu visto. Préstame más guardar el recuerdu d’aquel altu, seriu y amedranador vampiru, enllenu tamién d’erotismu, que me fizo encoyeme na butaca de dalgún d’aquellos prestosos cines qu’había nel centru de Xixón.
Nun sé quién-y pondría agora la cruz, los ayos o la estaca nel corazón pero, fuere quien fuere, que sepa que-y guardaré eternu odiu por eliminar a un de los mios «malos» favoritos. Anque conociéndolu, nun m’estrañaría nada que tornare a resucitar d’ente los muertos na figura mitolóxica del esperteyu. ¡Qué tengan cuidáu con él!
